चर्चित अधिवक्ता केसीद्वारा काठमाडौं १ (ख) बाट प्रदेशसभा सदस्यको उम्मेदवारीका लागि आवेदन दर्ता

१५ भदौ, काठमाडौं । देशकै राजधानी रहेको काठमाडौं जिल्ला निर्वाचन क्षेत्र नम्बर १ (ख) को प्रत्यक्षतर्फ चर्चित अधिवक्ता गणेश केसीले उम्मेद्बारी दर्ता गराएका छन् । आगामी मंसिर ४ गते हुने प्रदेशसभा निर्वाचनका लागि नेपाली कांग्रेसले उम्मेदवारी सिफारिसका लागि गरेको आह्वानमा केसीले उम्मेद्बारी दर्ता गराएका हुन् ।

नेपाली कांग्रेसका युवा नेता एवं चर्चित अधिवक्ता गणेश केसी सोही क्षेत्रबाट नेपाली कांग्रेसको १४ औँ महाधिवेशनमा महाधिवेशनमा क्षेत्रीय प्रतिनिधिसमेत रहेका छन् । विद्यार्थीकालदेखि नै राजनीतिमा सक्रिय रहेका केसीले यसअघि जिल्ला तथा क्षेत्रीय स्तरका विभिन्न जिम्मेवारी सम्हाल्दै आएका थिए ।

उनी लामो समयदेखि कानुन व्यवसायीका रुपमा सक्रिय रहदै आएका छन् । सोही क्षेत्रको शान्तिनगरमा बसोबास गर्ने अधिवक्ता केसी विभिन्न सामाजिक संघसंस्थाहरु लायन्स क्लबदेखि सामुदायिक प्रहरी केन्द्रका गतिविधिमा पनि सक्रिय छन् ।

पञ्चायतकालदेखि नेपाल विद्यार्थी संघको राजनीतिमा सक्रिय केसी नेपाल ल क्याम्पसको ईकाई सभापति हुँदै लोकतान्त्रिक कानुन व्यवसायीहरुको छाता संगठन डीएलएमा पनि सक्रिय रहँदै आएका छन्। नेपाल बार एशोसियशनका हरेक आन्दोलनमा सक्रिय केसीले दिनदुःखी तथा असहायहरुलाई निशुल्क कानुनी सहायता दिदै आएका छन् ।