सीट बाँडफाँडमा बामदेव र बाबुराम तगारो, ८५ मिल्यो ८० मिलेन

१६ भदौ, काठमाडौं । सत्ता गठबन्धनका शीर्ष नेताहरुबीच सीट बाँडफाँडमा बनिसकेको सहमति फेरी खलबलिएको छ । मंगलबार अबेर भएको भनिएको सहमति बुधबार मध्यान्हसम्म पनि नटिकेपछि एकीकृत समाजवादी पार्टीका अध्यक्ष माधवकुमार नेपाल बुधबार साँझको गठबन्धन बैठकमा सहभागी नै भएनन् । महत्वपूण बैठक छाडेर नेपाल राष्ट्रपति कार्यलय पुगेका थिए ।

अहिले गठबन्धनमा मिलाउन नसकेको बिषय भनेको २ सीट मात्रै हो । नेकपा माओवादीले मंगलबारको सहमति इन्कार गर्दै बामदेव गौतम र डा. बाबुराम भट्टराईसमेत गरी फेरी ५२ सीट मागेको छ । माओवादीका अध्यक्ष पुष्पकमल दाहाल‘प्रचण्ड’ले गरेको सीट भागबण्डामा कांग्रेसको सीट ८५ बाट घटेको छैन । उनले माओदीलाई ५२ राखेर नेकपा एसलाई १५, जनता समाजवादीलाई १३ र राष्ट्रिय जनमोर्चालाई २ सीट भनेका छन् ।

प्रचण्डले भनेअनुसार २ सीट पुर्याउन कसैन कसैले छोड्नै पर्छ, नत्र सीट छैन् । कार्यदलका एक नेताले बताए अनुसार बिहीबार बिहान भएका अनौपचारिक छलफलमा जनमोर्चालाई दिने भनिएको २ सीटमध्ये एउटा राष्ट्रियसभामा दिने । बामदेव गौतमालाई राजीनामा गर्न लगाएर उक्त ठाउमा जनमोर्चाकी दुर्गा पौडेललाई लाने र बागलुङमा एक सीट दिने । तर, यसो गर्दा पनि माओवादीले नै सीट घटाउनपर्ने देखिन्छ ।

नेकपा एसका अध्यक्ष माधवकुमार नेपाल प्रचण्डले यो हिसाब देखेपछि विच्किएका हुन् । उनले बुधबार नै कसैले छाडेको भाग खानका लागि आफु गठबन्धनमा नबस्ने बताइसकेका छन् । यही कारणले गर्दा नेपाल बुधबार साँझको गठबन्धन बैठकमा नगएका हुन् । नेपाल १८ देखि २० सीट भित्र चित्त बुझाउने पक्षमा थिए । उनले सार्वजनिक रुपमै आफुमाथि एकएक अपमान भएको बताएका छन् ।

यता, कांग्रेसभित्र पनि किचलै छ । बुधबार साँझ गठबन्धनको बैठक बस्ने भएपछि पार्टीको आधिकारिक धारणा बनाउन प्रधानमन्त्रीसमेत रहेका नेपाली कांग्रेसका सभापति शेरबहादुर देउवाले सीट बाँडफाँका विषयमा छलफल गर्न वर्तमान र पूर्वपदाधिकारीहरुको बैठक बालुवाटारमा बोलाएका थिए ।

बैठकमा कांग्रेसले लिने सीट र शीर्ष नेताबीच सहमतिमा पुग्न सकिने गरी भएका कुराकानीबारे देउवाले जानकारी गराएपछि बैठकमा तीन वटा आवाज चर्को रुपमा उठेका थिए ।

बैठकमा कांग्रेसले ६० प्रतिशत आफुसँग सुरक्षित राखेर बाँकीमा सीट मात्रै बाँडफँड गर्ने, कांग्रेसले जित्ने आधार भएका क्षेत्रहरु कुनै पनि हालतमा अरु दललाई नदिने र लोकतान्त्रिक समाजवादी पार्टी (लोसपा) लाई पनि समेट्नुपर्ने आवाज आएपछि सभापति देउवा झस्किएका थिए । शीर्ष नेताबीच मंगलबार अबेरमा कांग्रेसले ८५ सीट लिने र बाँकी ८० सीट दलको हैसियत अनुसार मिलाउने भन्ने सहमति भएको थियो ।

पदाधिकारी बैठकपछि कांग्रेसमा ८५ मा २ सीट भएपनि थप्नुपर्ने आवज उठिरहेको छ । आजको बैठकमा महामन्त्री गगन थापाले यसबारे प्रश्न उठाउने बताएका छन् । यसरी हेर्दा बाबुराम भट्टराई र बामदेव गौतमा माओवादीको चुनाव चिह्नबाट लड्ने भएकाले अध्यक्ष प्रचण्डले सीट बढाउन खोजिरहेका छन् ।

बाहिर ६० सीटको दावी भएपनि उनी ४० सीटमा लगभग सहमति आइकसेका थिए । प्रधामन्त्री देउवाले भने माओवादीलाई अझैपनि ४५ भन्दा तल झार्ने प्रयास गरिरहेकाे बताइन्छ ।