केन्द्रको निर्देशन विपरित कांग्रेस बागलुङले उम्मेदवार सिफारिसमै तोक्यो ७५ हजार शुल्क

१६ भदौ, बागलुङ ।  केन्द्रको निर्देशन विपरित नेपाली कांग्रेस बागलुङले प्रदेशका लागि ५२ हजार र प्रतिनिधिसभा सदस्य उम्मेदवार बन्नका लागि भर्नुपर्ने आवेदन शुल्क ७५ हजार ताकेको छ । नेपाली कांग्रेस केन्द्रले यसअघिनै उम्मेदवार सिफारिस गर्दा शुल्क नलिन निर्देशन दिइसकेको छ ।

केन्द्रको निर्देशा जाँदा पनि बागलुङ कांग्रेसले भने ७५ हजार रुपैयाँ शुल्क तोकेको छ । बागलुङ कांग्रेसले आकांक्षीहरूले उम्मेदवारको रुपमा सिफारिस हुन आवेदन दिनुपर्ने र त्यसका लागि ७५ हजार रुपैयाँ शुल्क तिनुपर्ने व्यवस्था गरेको हो । नेता, कार्यकर्ताले भने उम्मेदवारको रुपमा सिफारिस हुनकै लागि चर्को शुल्क तोकिएको भन्दै असन्तुष्टि जनाएका छन् ।

केन्द्रीय कार्यालयले १३ भदौमा गरेको सर्कुलरमा उम्मेदवार सिफारिस गर्दा कुनै पनि शुल्क नलिनु भन्ने निर्देशन दिएपनि जिल्ला कार्यसमितिले ७५ हजार रुपैयाँ शुल्क तोकेर उम्मेदवार बन्न खोज्नेको ढाड सेकेको नेताहरूको गुनासो छ ।

जिल्ला कार्यसम्पादन समितिले प्रतिनिधिसभा सदस्य र समानुपातिक उम्मेदवार बन्नका लागि पार्टी कार्यालय भवन बनाउन ६० हजार रुपैयाँ सहयोग गर्नुपर्ने मापदण्ड बनाएको छ । सो शुल्क बुझाएपछि थप १५ हजार तिरेर दरखास्त दर्ता गर्ने प्रावधान राखिएको छ ।

प्रदेशसभाका लागि पनि ४० हजार रुपैयाँ शुल्क तिर्नुपर्ने र थप १२ हजार तिरेपछि उम्मेदवारका लागि दरखास्त हुने जिल्ला कार्यसमितिको मापदण्ड छ ।

चर्को शुल्कबारे जिल्ला सचिव हरिहर शर्माले उम्मेदवार सिफारिस गर्दा पार्टीको भवन निर्माणका लागि सहयोग रकम उठाइएको बताएका छन् । उनले बीपी स्मृति भवन भनेर पार्टी कार्यालय बनाउने तयारी गरिएको र यो मौकामा केही रकम संकलन गर्न खोजिएको बताएका छन् ।

उनले कोही त्यत्ति शुल्क तिर्न नसक्ने, तर उम्मेदवारको सिफारिसमा हुनैपर्ने निष्ठावान व्यक्ति भए शुल्क नलिने समेत बताए । उनका अनुसार भवन निर्माणका लागि जग्गा खरिद गरी काम अघि बढाउन ५० लाख रुपैयाँ जम्मा भइसकेको छ ।