अर्थतन्त्रमा केही सहजता देखिएपनि राष्ट्र बैंकले लिएको नीतिमा परिवर्तन हुँदैनः गभर्नर

१८ भदौ, काठमाडौं । नेपाल राष्ट्र बैंकका गभर्नर महाप्रसाद अधिकारीले पछिल्ले समयमा देशको अर्थतन्त्र केही सहज बन्दै गएको बताएका छन् । उनले बैंक तथा वित्तीय क्षेत्र, निजि क्षेत्र र वैदेशिक व्यपारमा क्रमस सहजता देखिन थालेका दावी गरेका छन ।

गभर्नर अधिकारीले अर्थतन्त्रमा सहजता देखियो भन्दैमा मौद्रिक नीतिमाफर्त अंगिकार गरेका नीतिहरुमा कुनै परिवर्तन नआउने र राष्ट्र बैंकले बैंक तथा वित्तीय संस्थामाथि गरेको कडाइ कायमै रहने बताए । अझै पनि जोखिम कम नभएको भन्दै उनले राष्ट्र बैंकले अपनाएको सजगता तत्काल नहटाउने संकेत गरे ।

शनिबार नेपाल आर्थिक पत्रकार समाज सेजनको २४औं वार्षिक साधारणसभामा बोल्दै उनले अझै केही महिना आयातित केही वस्तुमा गरिएको कडाइ कायम रहेको बताए । अधिकारीले अझै पनि बाह्य क्षेत्रमा देखिएको जोखिम कम नभएको भन्दै जोखिमको अवस्था सामान्य भएपछि मात्रै आयात पूर्णरुपले खुलाउने बताए ।

उनले पेट्रोलियम पदार्थको मूल्य विश्वव्यापी रुपमा बढ्दा संसारभरका अर्थमन्त्री र गभर्नर दवावमा रहेको र नेपाल पनि यसबाट अछुतो नरहेको बताए । इन्धनको मूल्यबृद्धिको असर नेपालमा पनि अझै केही समय यथावत रहने उनको भनाइ छ ।

गभर्नर अधिकारीले बैंक तथा वित्तीय क्षेत्रमा देखिएको तरलताको समस्या आन्तरिकभन्दा बाह्य कारणले बढिरहेको बताए । उनले सुधारका लागि ठूला ऋणीहरुमा चेतना अउनुपर्ने बताए । उनले भने,‘मलाई तरलता हट्छ भनेर प्रश्न आइरहन्छ । यो बाह्य क्षेत्रका कारणले समस्या आएको हो । आन्तरिक रुपमा भएको पैसा जसले ऋण लिएको छ उसैसँग जाम भएर बसेको छ । तरलता अभाव समाधान हुन ऋणको अवस्थामा पनि सुधार हुनुपर्छ ।’

सरकारले पूँजीगत खर्च बढाउँदा केहि सहज हुने भन्दै उनले निजी क्षेत्रले ऋण तिरिदिए मात्रै तरलताको अभावमा सुधार हुँदै जाने र बैंक तथा वित्तीय संस्थाले पनि अनुशासनमा बस्नु पर्ने बताए । गभर्नर अधिकारीले अहिले बैंक तथा वित्तीय संस्थाहरु अनुशासित नभएकाले राष्ट्र बैंकले कडाई गर्नुपरेको बताए ।