उम्मेदवारका लागि मोरङ कांग्रेसले ६ वटै क्षेत्रबाट गर्यो सिफारिस, कोइराला भएनन् सर्वसम्मत

१९ भदौ, विराटनगर ।  आगामी मंसिर ४ मा हुने निर्वाचनका लागि नेपाली कांग्रेसले मोरङका ६ वटै क्षेत्रबाट प्रतिनिधिसभा सदस्य उम्मेदवारहरुको नाम सिफारिस गरेको छ । क्षेत्रीय समितिले उम्मेदवारको नाम जिल्लामा सिफारिस गरेको हो ।

नेपाली कांग्रेस मोरङका सचिव मोदराज घिमिरेका अनुसार क्षेत्र नम्बर १ बाट ४ जना, क्षेत्र नम्बर २ बाट दुई जना, क्षेत्र नम्बर ३ बाट सर्वसम्मत एक जना, क्षेत्र नम्बर ४ बाट पाँच जना र क्षेत्र नम्बर ६ बाट चार जनाको नाम सिफारिस भएको छ ।

मोरङ निवासी संस्थापनइतरका नेता डा.शेखर कोइरालालाई आफ्नो क्षेत्रबाट सर्वसम्मत गराउन नेताहरु असफल भएका छन् । कोइरालाको क्षेत्र नं. ६ बाट उनीसहित चारजना सिफारिस भएका छन् । यो क्षेत्रबाट कोइरालासँगै डा. डिला संग्रौला, राष्ट्रियसभा सदस्य रमेशजंग रायमाझी र शिवकुमार बस्नेतको नाम सिफारिस गरी जिल्लामा पठाइएको छ ।

क्षेत्र नम्बर १ बाट कांग्रेस जिल्ला सभापति डिगबहादुर लिम्बु, रामप्रसाद पोखरेल, आरती बराल र जयधर्म आचार्यको नाम सिफारिस भएको छ । २०७० सालको दोस्रो संविधानसभामा क्षेत्र नम्बर १ बाट निर्वाचित डिगबहादुर २०७४ सालको निर्वाचनमा वामगठबन्धन उम्मेदवार घनश्याम खतिवडासँग पराजित भएका थिए ।

मोरङ क्षेत्र नम्बर २ बाट डा. मिनेन्द्र रिजाल र सुजाता कोइरालाको नाम सिफारिस भएको छ । २०७४ सालको निर्वाचनमा मिनेन्द्रले वामगठबन्धन उम्मेदवार ऋषिकेश पोखरेललाई पराजित गरेका थिए । यसपटक भने उनलाई पार्टीभित्रै अर्की नेतृ सुजाता कोइरालाले टिकटमै कडा टक्कर दिएकी छन् ।

२०७४ सालको निर्वाचनमा वाम गठबन्धनका कारण कांग्रेस संकटमा परेको बेला मोरङका ६ क्षेत्रमध्ये क्षेत्र नम्बर २ मा मात्रै कांग्रेस विजयी भएको थियो । कांंग्रेसको क्षेत्रीय समितिले प्रतिनिधिसभा निर्वाचनको लागि रिजाल र कोइरालाको नाम सिफारिस गरेको छ । चुनावी दौडमा कसले टिकट पाउने भन्ने तय हुन बाँकी छ ।

प्रतिनिधिसभा सदस्य रहेका डा. रिजालले आफूले चुनावी अभियान शुरु गरिसकेको बताउँदै त्यही क्षेत्रमा कोइरालाको समेत नाम सिफारिस हुनु अनौठो नभएको बताएका छन् । मोरङमा कांग्रेसको जनलहर राम्रो मान्ने गरिएको भएपनि २०७४ निर्वाचनमा जम्मा एउटा निर्वाचन क्षेत्रमा रिजाल विजयी भएर कांग्रेसको साख बचाइदिएका थिए ।

कांग्रेसका पूर्वसभापति स्व. गिरिजाप्रसाद कोइरालाले चुनाव लडेको क्षेत्र भएकोले समेत नेतृ कोइरालाले आफू नै उठ्ने बताउँदै आएकी छन् । केहीअघि निर्वाचन क्षेत्रको दौडाहामा निस्किएकी कोइरालाले कार्यकर्ता र मतदातासँगको भेटमा आफू उम्मेदवार बनेर आउने बताएकी थिइन् ।

क्षेत्र नम्बर ३ बाट डाक्टर सुनिल शर्माको नाम सर्वसम्मत भएको छ । क्षेत्र नम्बर ३ बाट शर्माको एकल नाम सिफारिस भएको जिल्ला सचिव घिमिरेले बताए । शर्मा नोबेल मेडिकल कलेज विराटनगर र काठमाडौं मेडिकल कलेज काठमाडौंका सञ्चालक हुन् । २०७४ सालको निर्वाचनमा उनी वाम गठबन्धनका उम्मेदवार भानुभक्त ढकालसँग पराजित भएका थिए ।

क्षेत्र नम्बर ४ बाट महेश आचार्य, अमृत अर्याल, भीम पराजुली, गुरुराज घिमिरे र दिलीप गच्छदारको नाम सिफारिस भएको छ । २०७४ सालको निर्वाचनमा आचार्य माओवादी उम्मेदवार अमनलाल मोदीसँग पराजित भएका थिए । क्षेत्र नम्बर ४ बाट सिफारिसमा परेका कांग्रेस केन्द्रीय सदस्य अर्याल क्षेत्र नम्बर ५ बाट पनि सिफारिस भएका छन् । क्षेत्र नम्बर ५ बाट अर्याल र हसन अन्सारीको नाम प्रतिनिधिसभा सदस्यको उम्मेदवारका लागि सिफारिस भएको छ ।