सुरु भएन छपाइ, सर्वोच्चको आदेशले डिजाइनमा समस्या

२० भदौ, काठमाडौं । आगामी मंसिर ४ गते हुने आम चुनावका लागि मतपत्र छपाइ अनिश्चित भएको छ । आम निर्वाचनका लागि निर्वाचन आयोगले तयार गरेको कार्यतालिका बमोजिम भदौ २० गतेबाट समानुपातिकतर्फको मतपत्र छाप्न सुरु गर्नुपर्ने हो । तर आयोगका प्रवक्ता शालिग्राम शर्मा पौडेलले आन्तरिक तयारी नपुगेकोले आयोगको कार्यतालिका प्रभावित भएको बताएका छन् ।

आयोगले आन्तरिक तयारी नपुगेको दाबी गरेपनि राष्ट्रिय प्रजातन्त्र पार्टी(राप्रपा) नेपालको चुनाव चिह्नलाई लिएर मतपत्रको क्रम निर्धारण र डिजाइन हुन नसक्दा भदौ २० गते सोमबारबाट मतपत्र छपाइ सुरु हुन नसकेको हो । आयोगको निर्णयमा चित्त नबुझेपछि राप्रपा नेपालका अध्यक्ष कमल थापा सर्वोच्च अदालत पुगेका हुन ।

आयोगले राप्रपा नेपाललाई दिएको ‘तीर’ चुनाव चिह्नको कार्यान्वयन नगर्न/नगराउन सर्वोच्च अदालतले अल्पकालीन आदेश गरेपछि मतपत्रको डिजाइन गर्न बिलम्ब भएको आयोग स्रोतले जनाएको छ । उक्त मुद्दामा सर्वोच्च अदालतले सोमबार छलफलका लागि दुवै पक्षलाई बोलाएको छ । तर आयोगले उक्त आदेश ‘भ्याकेट’ गर्न निवेदन दिएको छ । अदालतको आदेशले कामकारबाहीमा समस्या उत्पन्न हुने अवस्थामा सम्बन्धित निकायले आदेश बदर गर्न दिने निवेदन ‘भ्याकेट’ हो ।

आयोगले भदौ ८ गते राप्रपा नेपाललाई ‘तीर’ चुनाव चिह्न दिने निर्णय गर्यो । तर सर्वोच्च अदालतले निर्णय कार्यान्वयन नगर्न अल्पकालीन आदेश जारी गरेपछि राप्रपा नेपाल तत्काल चुनाव चिह्नविहीन हुन पुग्यो । त्यसअघि, आयोगले असार २७ गते राप्रपा नेपालकाअध्यक्ष कमल थापाले माग गरेको ‘गाई’ चुनाव चिह्न दिन नमिल्ने निर्णय गरेको थियो । आयोगको उक्त निर्णयप्रति चित्त नबुझेको थापा सर्वोच्च अदालत पुुगेका थिए ।

सर्वोच्च अदालतले साउन ८ गते उक्त चिह्न अन्य कुनै दललाई नदिनुु भन्दै अन्तरिम आदेश जारी गरेको थियो । यसरी सर्वोच्च अदालतले राप्रपा नेपालको चुनाव चिह्नलाई लिएर समयमै टुङ्गो लगाउन नसक्दा निर्वाचन आयोगले कार्यतालिका बमोजिम मतपत्र छाप्न सकेको छैन् ।