राजनीतिमा पूर्वप्रहरी अधिकृतहरुको चासो, दलहरुको रोजाइमा को कहाँबाट भए सिफारिस

२० भदौ, काठमाडौं ।  नेपाल प्रहरी संगठनको नियमित बढुवा प्रक्रियामा चित्त नबुझेर राजीनामा दिएका र कार्यकाल सकिएर नियमित अवकाश प्रक्रियाबाट घर फर्किएका पूर्वप्रहरी अधिकारीहरु धमाधम राजनीतिमा होमिन थालेका छन् । यसमध्ये केही आगामी मंसिर ४ मा हुने प्रदेश र प्रतिनिधिसभा सदस्यको उम्मेदवारका लागि सिफारिससमेत भएका छन् ।

लामो समय प्रहरी संगठनमा रहेर काम गरेका उनीहरुका लागि अवकाश जीवन राजनीतिमा बिताउने अभिलाषा जागेपछि राजनीतिक दलहरुले पनि उनीहरुलाई धमाधम पार्टीमा स्थान दिइरहेका छन् । आगामी निर्वाचनमा प्रदेशसभा सदस्य र प्रतिनिधिसभा सदस्यका लागि उम्मेदवार बनाउन नेपाली कांग्रेस लगायतका पार्टीहरुले पाँचभन्दा बढी पूर्वप्रहरी अधिकारीहरुलाई सिफारिस गरिसकेको छ ।

सशस्त्र प्रहरी बलका पूर्वएआईजी सुबोधकुमार अधिकारी पनि कांग्रेसबाटै प्रतिनिधिसभा सदस्यको उम्मेदवारका लागि सिफारिसमा परेका छन् । कांग्रेसले अधिकारीलाई स्याङ्जा क्षेत्र नं. १ बाट प्रतिनिधिसभा सदस्यको उम्मेदवारका लागि सिफारिस गरेको हो । सशस्त्र प्रहरी बलमा अब्बल अधिकृतका रुपमा चिनिएका अधिकारी प्रजातन्त्र सेनानी स्वः शिवकुमार अधिकारीका छोरा हुन् । कानुनका ज्ञातासमेत रहेका अधिकारी सशस्त्र प्रहरीभित्र सक्षम,बौद्धिक र स्वच्छ छवि बनाएका अधिकृत हुन् । भावी आईजीपीको रुपमा हेरिएका अधिकारीलाई केपी ओली नेतृत्वको एमाले सरकारले अवधि बाँकी रहँदै एआईजीबाट जवरजस्ती राजीनामा दिन बाध्य पारेको थियो ।

उनको पारिवारिक राजनीति कांग्रेससँगै आबद्ध छ । उनका पिता स्व.शिवकुमार अधिकारी जिल्ला विकास समिति स्याङ्जाका पूर्व सभापतिसमेत थिए । स्व. अधिकारी कांग्रेस संस्थापक नेता एवं प्रथम जननिर्वाचित प्रधानमन्त्री बीपी कोरालाका सहयात्री हुन् । उनलाई स्याङ्जाको बमकाण्डका नाइकेको रुपमा पनि चिन्ने गरिन्छ । उनको परिवार पार्टी स्थापनादेखिनै नेपाली कांग्रेससँग आबद्ध भएकाले पनि सुवोधकुमार अधिकारीलाई कांग्रेसले प्रतिनिधिसभा सदस्यको प्रत्यक्षतर्फको उम्मेदवारका लागि सिफारिस गरेको हो ।

त्यस्तै नेपाली कांग्रेसले कांग्रेस नेता एवं पूर्व उपप्रधान तथा गृहमन्त्री विजयकुमार गच्छदार निटक मानिएका पूर्वडीआईजी भक्तीनाथ माझीलाई मोरङ ४ बाट प्रतिनिधिसभाको समानुपातिकतर्फ उम्मेदवारका लागि सिफारिस गरेको छ । प्रतिनिधिसभाको समानुपातिकतर्फ सिफारिस भएका उनको नाम जिल्ला हुँदै केन्द्रमा आउँदैछ । माझी नेपाल प्रहरीका सक्षम अधिकृतको रुपमा परिचित छन् ।

यसैगरी नेपाल प्रहरीका पुर्वएसएसपी बिक्रमसिंह थापा पनि प्रदेशसभा सदस्यको उम्मेदवारका लागि एकल सिफारिसमा परेका छन् । उनी कपिलवस्तु निर्वाचन क्षेत्र न.२ (क) बाट प्रदेशसभा सदस्यको उम्मेदवारका लागि सिफारिसमा परेका हुन् । थापालाई पनि नेपाली कांग्रेसले नै उम्मेदवारका लागि सिफारिस गरेको हो । नेपाल प्रहरीमा रहँदा सिंघमको उपाधिले परिचित थापा सक्षम र अब्बल प्रहरी अधिकारीका रुपमा परिचित छन् ।

लुम्बिनी प्रदेशसभा सदस्यको उम्मेदवारको लागि सिफारिसमा परेका थापा नेपाल प्रहरीमा नाम चलेका र अपराध अनुसन्धानमा अब्बल अधिकृतको रुपमा चिनिन्छन् । थापा प्रहरी संगठनबाट अवकाश लगत्तै तीन वर्षअघि नेपाली कांग्रेसमा प्रवेश गरेका थिए ।

२०७४ को निर्वाचन अघि कांग्रेस नेतृत्वको सरकार रहेका बेला प्रहरी प्रमुखको दाबेदार रहेको पूर्व डीआइजी नवराज सिलवाल यसपटक पनि ललितपुर क्षेत्र न. १ बाट नेकपा एमालेका तर्फबाट पुनःसिफारिसमा परेका छन् । हाल प्रतिनिधिसभा सदस्यसमेत रहेका सिलवाल प्रतिनिधिसभा सदस्यको उम्मेदवारका लागि सिफारिस भएका हुन् ।

एमाले ललितपुर अध्यक्ष पुरुषोतम आचार्यले प्रतिनिधिसभाका लागि सिलवालको नाम एकल रुपमा सिफारिस भएको बताए । सिलवालले गत निर्वाचनमा सोही क्षेत्रबाट जितेका थिए । सर्वोच्चमा किर्ते कागज पेश गरेको अभियोग लागेपछि लामो समय फरार रहेका सिलवालको नाममा रेडकर्नर नोटिस समेत जारी भएको थियो । उनले निर्वाचन जितेपछि माधवकुमार नेपालले उनलाई लुकाएर संसद भवन छिराएका थिए ।

यस्तै आईजीपीकै प्रतिस्पर्धामा रहेका पूर्वडीआईजी रमेश खरेल पनि काठमाडौं निर्वाचन क्षेत्र नम्बर १ बाट चुनाव लड्ने तयारीमा छन् । उनी आफ्नै पार्टीबाट चुनाव लड्न लागेका हुन् । नेपाल सुशासन पार्टीका अध्यक्ष समेत रहेका खरेलले आगामी प्रतिनिधिसभाको निर्वाचनमा काठमाडौं १ बाट उम्मेदवारी दिने तयारी गरेका छन् । खरेलले उम्मेदवारी दिने घोषणा गरेको उक्त क्षेत्रबाट २०७४ को संघीय निर्वाचनमा सत्तारुढ दल नेपाली कांग्रेसका पूर्वउपसभापति प्रकाशमान सिंह विजयी भएका थिए ।

पूर्वराष्ट्रसेवकको अनुभव र सीपले दललाई पनि फाइदा हुने भन्दै दलहरुले उनीहरुलाई स्थान दिएका हुन् । यता राप्रपाबाट पूर्वप्रहरी महानिरीक्षक ध्रुवबहादुर प्रधान पनि प्रतिनिधिसभा सदस्यका लागि उम्मेदवारी दिने तयारमा रहेको बताइएको छ । उनी राप्रपाका उपाध्यक्षसमेत हुन् । राप्रपाले उनलाई प्रत्यक्ष वा समानुपातिक के बाट उम्मेदवार बनाउने भन्ने एकिन गरेको छैन् ।

संगठनमा रहँदा स्वच्छ छवि बनाएका पूर्वडीआईजी गणेश केसी ललितपुर जिल्लाबाट कांग्रेसको महाधिवेशन प्रतिनिधिको उम्मेदवार बनेका थिए । तर २२ मतको अन्तरले उनले चुनाव हारे । उनको नाम पनि सिफारिसमा पर्ने चर्चा छ । उनी महालक्ष्मी नगरपालिकामा गत स्थानीय चुनावमा मेयरको प्रबल दावेदार थिए । अर्का पूर्व डीआइजी दिनेश अमात्यको धनकुटाबाट कांग्रेसको उम्मेदवारमा सिफारिस हुने चर्चा चलिरहेको छ । उनी महाधिवेशन प्रतिनिधि पनि हुन् ।

यस्तै यसैवर्ष कांग्रेस क्रियाशील सदस्यता लिएका पूर्व डीआईजी पूर्णचन्द्र जोशीले दार्चुलाबाट कांग्रेसको उम्मेदवार बन्न चाहेका छन् । अन्य थुप्रै अवकाशप्राप्त एसएसपी एसपी र डीएसपीहरुसमेत कांग्रेसप्रति आकर्षित भएको र उम्मेदवार बन्न चाहेको बताइन्छ ।