कांग्रेसले नाम चलेका र प्रभावशाली नेतालाई समानुपातिक नदिने, पदाधिकारी जति सबैलाई प्रत्यक्षको टिकट

२० भदौ, काठमाडौं । नेपाली कांग्रेसले चुनाव लड्न चाहने वर्तमान तथा पूर्वपदाधिकारीहरुलाई समानुपातिकतर्फ उम्मेदवार नबनाउने भएको छ । पार्टीमा प्रभाव जमाउन सक्ने र नाम चलेका नेताले पनि समानुपातिकबाट उम्मेदवारी दिन नपाउने नीति सार्वजनिक गर्ने कांग्रेसको तयारी छ ।

प्रधानमन्त्री शेरबहादुर देउवानिकट स्रोतले दिएको जानकारी अनुसार पदाधिकारीमा रहिसकेका नेताले प्रत्यक्षबाट चुनाव लड्नुपर्नेछ । उनीहरुलाई समानुपातिकमा राख्दा अन्यले अवसर नपाउने र चुनाव पनि हार्ने सम्भावनालाई मध्यनजर गर्दै यस्तो नीति अपनाउन लागिएको हो ।

पदाधिकारी जति सबैलाई प्रत्यक्षबाट चुनाव लडाउने विषयमा सभापति देउवाले आन्तरिक छलफलसमेत चलाएका छन् । उनले उपसभापति र महामन्त्रीद्वयसँग पनि यही नीतिअनुसार प्रक्रिया अगाडी बढाउन भनेका छन् । तर १४ औँ महाधिवेशन सकिएको आठ महिना पुगिसक्दासमेत सभापति देउवाले पदाधिकारीमा पूर्णता दिन सकेका छैनन् ।

हाल प्रधानमन्त्रीसमेत रहेका सभापति देउवासहित कांग्रेसमा १३ जना पदाधिकारी छन् । उनीहरु सबै प्रतिनिधिसभा सदस्यको उम्मेदवारका लागि प्रत्यक्षतर्फबाट सिफारिस भइसकेका छन् । जसअनुसार प्रधानमन्त्री देउवा डडेल्धुराबाट सर्वसम्मत सिफारिस भएका छन् । उपसभापति पूर्णबहादुर खड्का सुर्खेत १ र अर्का उपसभापति धनराज गुरुङ स्याङ्जा १ र २ बाट प्रतिनिधिसभाको प्रत्यक्षतर्फ उम्मेदवार सिफारिस भएका छन् ।

महामन्त्रीद्वय गगनकुमार थापा काठमाडौं क्षेत्र न.४ र कास्की क्षेत्र नं. १ बाट र विश्वप्रकाश शर्मा झापा क्षेत्र न. १ बाट सिफारिस भएका छन् । सहमहामन्त्रीहरू महालक्ष्मी उपाध्याय (डिना) मकवानपुर क्षेत्र नं २, किशोरसिंह राठौर बाँके क्षेत्र न.३ र बद्री पाण्डे बाजुराबाट सिफारिस भएका छन् । यस्तै भीष्मराज आङ्दम्बे पाँचथर, महेन्द्र यादव धनुषा क्षेत्र न.४, उमाकान्त चौधरी बारा क्षेत्र न. १, जीवन परियार कास्की क्षेत्र न. १, फरमुल्लाह मन्सुर बारा क्षेत्र न.३ बाट सिफारिस भएका छन् ।

नेता रामचन्द्र पौडेल तनहुँ क्षेत्र न. १ बाट सिफारिस भएका छन् भने नेता शेखर कोइराला मोरङ ६ बाट सिफारिस भएका छन् ।पूर्वमहामन्त्री तथा अर्का नेता कृष्णप्रसाद सिटौला झापा क्षेत्र न.३ बाट प्रत्यक्षतर्फ उम्मेदवारका लागि सिफारिस भएका छन् ।पूर्वउपसभापति विजय गच्छेदार सुनसरी क्षेत्र न. ३ बाट, सुजाता कोइराला मोरङ क्षेत्र न. २ बाट, प्रवक्ता डा. प्रकाशशरण महत नुवाकोट क्षेत्र न. १ बाट, पूर्वमहामन्त्री शशांक कोइराला पूर्वी नवलपरासी क्षेत्र न. १ बाट सिफारिस भएका छन् ।

गठबन्धन गरेरै चुनावमा जाने तयारी गरेको कांग्रेसले आफुले पाएका सीट नगुमाउनका लागि यस्तो नीति लिएको बताइएको छ । कांग्रेसले पदाधिकारी र प्रभावशाली नेताहरूलाई प्रत्यक्षतर्फ नै प्रतिस्पर्धा गराउने भएपछि पूर्वपदाधिकारीहरुले पनि प्रत्यक्षतर्प नै रुचि देखाएको देउवा निकट स्रोतको भनाइ छ ।

पार्टीको विधानमा भने पदाधिकारी र प्रभावशाली नेतालाई प्रतिनिधिसभामा प्रत्यक्षतर्फ उम्मेदवारी बनाउने उल्लेख गरिएको छैन् । चुनाव जित्नै पर्ने र प्रायःजसोले प्रत्यक्षतर्फ नै निर्वाचन लड्ने रुचि राखेकाले पार्टीका शीर्ष र प्रभावशाली नेतालाई प्रत्यक्षमा लडाउन लागिएको हो । सिफारिसका लागि केन्द्रले दिएको समय २० भदौसम्मको हो । केन्द्रमा सिफारिस आउने क्रममा अहिले जारी छ ।

पार्टीले शीर्ष र प्रभावशाली नेतालाई प्रत्यक्षतर्फ नै व्यवस्थापन गर्ने नीति लिएपछि समानुपातिकमा बस्न चाहेका प्रभावशाली नेताहरु भने समस्यामा परेका छन् । नेता विमलेन्द्र निधिको नाम समानुपातिक तर्फबाट सिफारिस भएको छ । धनुषा क्षेत्रनम्बर ३ को क्षेत्रीय समितिले प्रतिनिधिभाका लागि निधिको नाम समानुपातिकमा सिफारिस गरेको हो ।

कांग्रेस प्रत्यक्षमा लडाउने नीति लिएपछि निधिलगायतका केही नेताहरु समस्यामा परेका छन् । अघिल्लो पटकको निर्वाचनमा निधि लोसपा नेता राजेन्द्र महतोसँग पराजित भएका थिए । यसपटक पनि आफू अनुकूल चुनावी परिणाम नआउने संकेत पाएपछि निधि समानुपातिकमा रहेर सिट सुरक्षित गर्न चाहेका थिए । त्यसको जानकारी उनले पार्टी सभापति शेरबहादुर देउवालाई गराएपनि देउवाले कुनै जवाफ नदिएको बताइएको छ ।