तीन डिपो प्रमुख सरुवा गर्ने निर्देशक थानीको तयारी, आर्थिक चलखेलको आशंकाले सञ्चालक समितिमै विवाद

२१ भदौ, काठमाडौं ।  नेपाल आयल निगमका कार्यकारी निर्देशक उमेशप्रसाद थानीले निर्वाचन आचासंहिताको उल्लघंन गर्दै तीन वटा ठूला डिपोका प्रमुखहरुको सरुवा गर्ने तयारी गरेका छन् । निगम कर्मचारी स्रोतका अनुसार मालदार मानिएका डिपोमा जानका लागि ठूलै रकम खर्चने परम्परा निगमभित्र रहँदै आएको छ ।

रकम चलखलेकै आधारमा हाल कार्यरत डिपो प्रमुखहरुलाई सरुवा गरेर उक्त ठाउँमा नयाँलाई पठाउने योजना कार्यकारी निर्देशन थानीले बनाइरहेको कर्मचारी स्रोतको भनाइ छ । नेपालबहससँग कुरा गर्दै निगम कर्मचारी स्रोतले भन्यो,‘ डिपो प्रमुख परिवर्तन गर्दा आर्थिक चलखेल भएको शंका उब्जिएपछि सरुवा गर्नेबारे सञ्चालक समितिमा समेत विवाद उत्पन्न भएको छ । निगम सञ्चालक समितिमा सहमति नभएपछि सोमबार गर्ने भनेको सरुवा रोकिएको हो ।’

थानीमाथि यसअघि पेट्रोल पम्पहरुसँग मिलेर पेट्रोलियम पदार्थको मुल्यबृद्धि गरेको र पम्पलाई अगाडीको मुल्यमा तेल दिएर कमिशन लिएको आरोप पनि लगाइएको थियो । उनले पुरानो मूल्यमा तेल दिएर पम्प भरिएपछि बजार मूल्य बढेको सूचना जारी गराएको कर्मचारीहरु नै बताउँछन् । विभिन्न उपभोक्ता सम्बन्धी काम गर्दै आएका संघसंस्थाहरुले समेत थानीसहित उद्योग,वाणिज्य तथा आपूर्तिमन्त्री दिलेन्द्रप्रसाद बडूले रातारात कमिशन लिएर इन्धनको मूल्य बढाएको आरोप लगाएका थिए ।

निर्वाचन आयोगले आज (मंगलबार) देखि कुनै पनि कार्यलयका कर्मचारी सरुवा, बढुवा र पदस्थापन गर्न रोक लगाएको छ । आयोगले रोक लगाए पनि निर्देशक थानीले भने सोमबारभन्दा अगाडीको मिति राखेर उनीहरुको सरुवा गर्ने तयारी गरेका छन् । सोमबार मध्यरातिबाट कर्मचारी सरुवामा निर्वाचन आचारसंहिता लगाइएको छ ।

यसअनुसार कर्मचारी सरुवा र बढुवा गर्न नपाइने भएपछि उनले निगम व्यवस्थापन समक्ष अघिल्लो मिति राखेर भएपनि नेपालगन्जस्थित इन्धन डिपो, भैरहवास्थित लुम्बिनी प्रादेशिक कार्यालय र पोखरास्थित गण्डकी प्रादेशिक कार्यालयको नेतृत्व हेरफेर गर्न चाहेको कर्मचारी स्रोतको भनाइ छ । थानी तीनवटै डिपो प्रमुख हेरफेरको निर्णय सोमबार साँझभित्रै गराउने पक्षमा थिए ।

यसैअनुरुप उनले सोमबार साँझ निगमको सञ्चालक समिति बैठक डाकेर सरुवाबारे प्रस्ताव लगेका थिए । तर, आर्थिक चाखेलको प्रसंग उठेपछि बैठक लम्बिएको र समितिका सदस्यहरुबीच विवाद भएपछि डिपो प्रमुख सरुवाको निर्णय हुन नसकेको स्रोतको भनाइ छ ।

कर्मचारी स्रोतले दिएको जानकारी अनुसार निर्देशक थानीले नेपालगन्ज इन्धन डिपोका प्रमुख दीपक घिमिरे, लुम्बिनी प्रादेशिक कार्यालय भैरहवाका प्रमुखा नवविनोद पोख्रेल र गण्डकी प्रादेशिक कार्यालय पोखराका प्रमुख इन्दु शर्मालाई केन्द्रीय कार्यालयमा ल्याउन खोजेका छन् । उनीहरुलाई केन्द्रमा तानेपछि उक्त ठाउँमा अरुलाई पठाइने छ ।

निर्देशक थानीसँग ती डिपोमा जानका लागि आधा दर्जनभन्दा बढीले चाकडी गरिरहेका छन् । स्रोतका अनुसार नेपालगन्ज डिपोमा जानका लागि जगदीश यादव, सतिशराज ओझा र दुर्गा पछाइले पहल गरिरहेका छन् । भैरहवा कार्यालय जानका लागि कमला न्यौपाने, जगदीश यादव, मोहन शाह र चित्तरञ्जन दासले दावी प्रस्तुत गरेको स्रोतको भनाइ छ । यस्तै पोखरा कार्यालयमा जानका लागि मनोहर डिसी र मनोज ढकालले थानीको चाकडी गरिरहेका छन् ।

आकर्षक पद र माल कमाउने ठाउँका रुपमा चिनिएका यस्ता आयल निगमका डिपोमा प्रमुख भएर जान मागेको नजराना चढाउने चलन आयल निगममा पुरानै हाे । यसैका लागि पनि निर्देशक थानीले निर्वाचन आचारसंहिता विपरित अगाडीको मिति राखेर डिपो प्रमुखहरुको हेरफेर गर्न लागेको कर्मचारीहरु बताउँछन् ।