माओवादीलाई बाहिर राखेर सर्वोच्चमा तीन न्यायाधीश सिफारिस

२१ भदौ, काठमाडौं । न्यायपरिषद बैठकले सर्वोच्च अदालतमा तीन जना न्यायाधीश सिफारिस गरेको छ । सोमबार साँझ बसेको बैठकले दुई जना उच्च अदालतका मुख्य न्यायाधीश र एकजना विश्वविद्यालयका प्राध्यापकलाई सर्वोच्च अदालतको न्यायाधीशमा सिफारिस गरेको हो ।

तुल्सीपुर उच्च अदालतकी मुख्य न्यायाधीश नीता गौतम दीक्षित र जनकपुर उच्च अदालतका कायममुकायम मुख्य न्यायाधीश विनोद शर्मालाई सर्वोच्चमा सिफारिस गरिएको हो । त्यसैगरी त्रिभुवन विश्व विद्यालयका सहप्राध्यापक तथा नेपाल ल क्याम्पसका चीफ प्रोफेसर डा. डीएन पराजुलीलाई पनि सर्वोच्च अदालतमा न्यायधीश सिफारिस गरिएको छ ।

तर उच्च अदालतका मुख्य न्यायाधीशहरुमध्ये वरिष्ठतम नृपध्वज निरौलालाई छुटाइएको छ । सेवा अवधि नपुगेका कारण सिफारिस गर्न नमिलेको भन्दै उनलाई छुटाइएको हो । मुख्य न्यायाधीशमा पाँच वर्ष सेवा गरेको हुनुपर्नेमा उनको जम्मा दुई वर्ष मात्रै भएकाले छुटाइएको स्रोतले जनाएको छ ।

बैठकमा माओवादी निकटमध्ये बारका पूर्व पदाधिकारी तथा कानुन व्यवसायी दिनमणि पोखरेलको नाममा निकै चर्चा भएपनि उनलाई समेत नियुक्ति नगरिएकाले माओवादी गठबन्धनसँग चिढिएको छ । ‘प्रधानमन्त्री आफैले सिफारिस, प्रकृयामा हस्तक्षेप गरेका छन्’, माओवादी निकट एक नेताले भने ।