प्रतिनिधिसभामा कांग्रेसलाई ८६ सीट, चारदलको भागबण्डा मिलाएर निर्णय सार्वजनिक गरिँदै

२२ भदौ, काठमाडौं । सत्ता गठबन्धनमा रहेका पाँच दलले प्रतिनिसिभाका १६५ सीटको भागबण्डा लगभग मिलाएका छन् । मंगलबारको कार्यदलको बैठकले सत्ता नेतृत्व गरिहेको नेपाली कांग्रेसलाई ८६ सीट दिएर बाँकी सीट चादलले मिलाएर लिने सहमति भएको छ । कार्यदलमा भएको सहमति आज सार्वजनिक गरिँदैछ ।

आगामी निर्वाचनमा सत्ता गठबन्धनमा कसले कति सिट पाउने भन्ने विषयमा भएको सहमति सिट बाँडफाँट कार्यादलले आज सार्वजनिक गर्ने भएको हो । मंगलबार साँझ बालुवाटारमा बसेको गठबन्धनको सिट बाँडफाँड कार्यदल बैठकले गरेको सहमति अन्तर्गत चारदलमा मिलाउन बाँकी छ ।

कार्यदलको सदस्यसमेत रहेका सञ्चारमन्त्री ज्ञानेन्द्रबहादुर कार्कीले नेपालबहसलाई दिएको जानकारी अनुसार प्रमुख सत्तारुढ दल नेपाली कांग्रेसले ८६ सिटमा चित्त बुझाएको छ । अरू बाँकी सिटबारे दलहरूबीच छलफल हुनेछ । यसको जिम्मा नेकपा माओवादी केन्द्रका अध्यक्ष पुष्पकमल दाहाल‘प्रचण्ड’लाई दिइएको छ ।

कांग्रेसले १०० सिटमा दाबी गर्दै आएको थियो । कांग्रेसको संस्थापन इतरपक्ष ९० सिटभन्दा तल नझर्ने अडानमा थियो । तर, केहीदिन अघि पार्टी सभापति शेरबहादुर देउवाले ८६ सिटमा चित्त बुझाउन कार्यदलका सदस्यहरूलाई निर्देशन दिएका थिए ।

माओवादीका अध्यक्ष प्रचण्डले कांग्रेससँग ५० प्रतिशत राखेर बाँकीको जिम्मेवारी आफूलाई दिन आग्रह गरेका थिए । सोही अनुसार उनलाई जिम्मा दिइएको हो । सरकारका प्रवक्तासमेत रहेका सञ्चारमन्त्री ज्ञानेन्द्रबहादुर कार्कीले आफूहरूबीच सहमति भइसकेको बताएका छन् ।

लिपिबद्ध गर्न मात्र बाँकी रहेको उनको भनाइ छ । बुधबार बस्ने कार्यदलको बैठकले प्रतिवेदन नै तयार पार्ने उनको दाबी छ । आफूहरूबीच सहमति भइसकेको भए पनि सिट संख्याको विवरण अहिले नै सार्वजनिक गर्न हतार हुने उनले बताएका छन् । बुधबारको बैठकमा प्रतिवेदन तयार गरेर लिपिबद्ध गर्ने र सिट संख्याबारे भएको निर्णय सार्वजनिक गर्ने बताए ।