तयारी नपुग्दा एकदिनपछि मतपत्र छाप्न सुरु

२२ भदौ, काठमाडौं । निर्वाचन आयोगले मंगलबारबाट मतपत्र छाप्न सुरु गरेको छ । आगामी चुनावका लागि आयोगले समानुपातिकतर्फको नमूना मतपत्र छाप्न सुरु गरेको हो । आयोगको आन्तरिक कार्यतालिका बमोजिम भदौ २० गतेबाट नै मतपत्र छाप्न सुरु हुनुपर्ने थियो तर तयारी नपुग्दा एकदिनपछि मतपत्र छाप्न सुरु भएको हो ।

निर्वाचन आयोगका प्रवक्ता शालिग्राम शर्मा पौडेलले दुई दिनभित्र नमूना पत्र छपाइ सकेर समानुपातिकको मतपत्र छाप्न सुरु हुने बताएका छन् । पहिलो चरणमा आयोगलेनिर्वाचन शिक्षा कार्यक्रमका लागि छ लाख मतपत्र छाप्नेछन् । आम निर्वाचनका लागि आवश्यक सबै मतपत्र भक्तपुरस्थित जनक शिक्षा सामग्री केन्द्र प्रा।लि।मा छापिने आयोगले जनाएको छ ।

जनक शिक्षा सामग्री केन्द्र स्रोतका अनुसार मंगलबार अपराह्न चार बजेदेखि मतपत्र छाप्न सुरु भएको हो । जनक शिक्षा सामग्रिको दैनिक १२ देखि १५ लाख मतपत्र छाप्ने क्षमता छ । आयोगका प्रवक्ता पौडेलल भने, “नमूना मतपत्र छपाइ सकिए लगत्तै समानुपातिकतर्फको मतपत्रको डिजाइन तयार गरेर जनक शिक्षालाई दिइनेछ ।”

निर्वाचन आयोगले समानुपातिकतर्फको मतपत्रको डिजाइन अझै गरिसकेको छैन् । राष्ट्रिय प्रजातन्त्र पार्टी ‘नेपाल’को चुनाव चिह्नबारे रिट सर्वोच्च अदालतले खारेज गरेको छ । सर्वोच्च अदालतमा राप्रपा नेपालले निर्वाचन आयोगले प्रदान गरेको तीर चुनाव चिह्न खारेज गरी गाई कायम गरिदिन रिट दायर गरेको थियो । उक्त मुद्दामा अदालतले मंगलबार रिट खारेज गर्दा राप्रपा नेपालको तीर चुनाव चिह्न नै कायम हुने भएको छ ।

सर्वोच्चको उक्त आदेशपछि निर्वाचन आयोगले राप्रपा नेपालको चुनाव चिह्न तीर राखेर मतपत्र छाप्ने बाटो खुला भएको हो । आयोगको कानुन तथा राजनीतिक दल व्यवस्थापन महाशाखाका उपन्यायधिवक्ता गुरु प्रसाद वाग्लेले अदालतको आदेशपछि चिह्न कायम गर्न र मतपत्र छपाइको अवरोध हटेको बताए ।

आठ करोड मतपत्र छापिने

मंसिर ४ मा हुने आम चुनावका लागि ५०३ प्रकारको करिब ८ करोड मतपत्र छापिनेछन् । आयोगको निर्वाचन शाखाका अनुसार समानुपातिकतर्फ चार करोड र पहिलो हुने निर्वाचित हुने प्रणाली९प्रत्यक्ष०तर्फ चार करोड मतपत्र छापिनेछन् ।

आयोगले आगामी चुनावमा करिब एक करोड ८० लाख मतदाता कायम हुने अनुमान गरेको छ । कायम रहेको मतदाताभन्दा दश प्रतिशत बढी मतपत्र छाप्दै आएको अभ्यास छ । सोही आधारमा प्रतिनिधि सभाको प्रत्यक्षतर्फ दुई करोड र प्रदेश सभाको प्रत्यक्षतर्फ दुई करोड मतपत्र छापिनेछ ।

सोही सङ्ख्यामा प्रतिनिधि र प्रदेश सभाको समानुपातिकतर्फको मतपत्र छापिनेछन् । आयोगले प्रतिनिधि र प्रदेश सभाको समानुपातिक तर्फको मतपत्र असोज २५ गतेभित्र छापिसक्ने लक्ष्य राखेको छ ।