सन्दीपबारे निर्णय लिन क्यान छलफलमा जुट्यो, सीपीएल खेल्न पाउलान त ?

२२ भदौ, काठमाडौं । राष्ट्रिय टिमका कप्तान सन्दीप लामिछानेविरुद्ध बलात्कार उजुरी परेपछि नेपाल क्रिकेट संघ (क्यान) अनौपचारिक छलफलमा जुटेको छ । सन्दीप हाल क्यारेबियन प्रिमियर लिग(सीपीएल) खेल्न वेष्टइन्डिजमा छन् ।

बलात्कार जस्तो गम्भीर मुद्दा परेकाले उनलाई टिममा राखिराख्ने वा निलम्बन गर्ने विषयमा क्यानमा छलफल चलिरहेको छ । उपत्यका बाहिर रहेका क्यान अध्यक्ष चतुरबहादुर चन्द फर्किएपछि उपलब्ध पदाधिकारी तथा बोर्ड सदस्यहरुको बैठक बसेर निर्णय गर्ने क्यानको तयारी छ । क्यानले उनलाई निलम्बन गरे सीपीएल खेल्न पाउने छैनन् ।

क्यानले भने आरोप लाग्नासाथ निलम्बन गर्ने वा दोषी प्रमाणित भएपछि मात्रै कारबाही गर्ने दुबै अभ्यास अन्तर्राष्ट्रिय स्तरमा देखिएकोले छलफलपछि मात्रै कुनै निर्णयमा पुग्ने जनाएको छ ।