पर्यटनमन्त्री श्रेष्ठका कारण ऋणले थिचिएको निगममा रँडाको, अध्यक्षलाई बर्खास्त गर्ने तयारी

२२ भदौ,काठमाडौं ।  पटक पटकको राजनीतिक हस्तक्षेप र आन्तरिक रुपमै हुँदै आएको चरम भ्रष्टाचारले टाट पल्टिएको नेपाल वायुसेवा निगममा संस्कृति, पर्यटन तथा नागरिक उड्डयनमन्त्री जीवनराम श्रेष्ठ र कार्यकारी अध्यक्ष युवराज अधिकारीबीचको विवादले रँडाको मच्चिएको छ ।

मन्त्रीमा शपथ लिए लगत्तै श्रेष्ठले निगमका अध्यक्ष अधिकारीलाई हटाउने प्रयास गरेका थिए । तर, सर्वाेच्चको अन्तरिम आदेशबाट फर्किएका अधिकारीलाई तुरुन्तै हटाउँदा आफैलाई समस्या पर्ने भएपछि रोकिएका मन्त्री श्रष्ठ अहिले फेरी तातेका छन् । कार्यकारी अध्यक्ष अधिकारी अहिले डेँगु लागेर घर बिदामा बसेका छन् ।

अधिकारी निको भएर निगममा फर्किए लगत्तै मन्त्री श्रेष्ठले उनलाई बर्खास्त गर्न मन्त्रिपरिषदमा प्रस्ताव लाने तयारी गरिरहेको बताइएको छ । स्रोतका अनुसार मन्त्री श्रेष्ठले अधिकारीलाई हटाएर नयाँ व्यक्तिलाई कार्यकारी अध्यक्ष बनाउने र निगममा अस्थायी कर्मचारी भर्ना गराउने रणनीति बनाएका छन् । उनले अहिले निगम सुधारका लागि कुनै पहलसमेत गरेका छैनन् ।

निगम कर्मचारीका अनुसार कार्यकारी अध्यक्ष अधिकारीलाई कमजाेर बनाउनका लागि ग्राउण्डेड भएको जहाज बनाउनसमेत रोकेका छन् । उता, कर्मचारी सञ्चय कोष र नागरिक लगानी कोषले ऋणको ब्याजका लागि ताकेता गरिरहँदा समेत पर्यटनमन्त्री श्रेष्ठले कुनै पहल नगरेको कर्मचारीहरु बताउँछन् ।

विगत केही वर्षदेखि निगमले चार वटा ठूला जहाज किन्न लिएको ५० अर्ब ऋणको भारमा थिचिएको छ । यसको मासिक ब्याज मात्रै २५ करोड रुपैयाँ हुन आउँछ । जहाज नियमित नहुँदा निगमको आम्दानी दिनानुदिन घटिरहेको छ । मन्त्री श्रेष्ठले निगममा चलखेल सुरु गरेपछि निगम व्यव्स्थापनसमेत अन्योलमा परेको बताइन्छ । पर्यटन मन्त्रालय मातहमा रहेको निगममा मन्त्री श्रेष्ठले दवाव दिन थालेपछि कर्मचारी समेत रुष्ट देखिएका छन् ।

निगम टाट पल्टदै गएपछि ऋणको ब्याज महँगो भएको भन्दै अर्थमन्त्रालयले सस्तो ऋणका लागि विदेशी निकायसँग छलफल गरिरहेको छ । त्यही निगमको एउटा न्यारोबडी जहाज ग्राउण्डेड भएको एकमहिना हुन लागेको छ । तर मर्मतका लागि भने कुनै पहल नभएको कर्मचारीहरु बताउँछन् ।

निगम कर्मचारी सञ्चय कोष र नागरिक लगानी कोषलाई असारसम्मको मात्रै ऋण दायित्वको किस्ताबापत १ अर्ब ३५ करोड भुक्तानी गरेको छ । डेढ वषदेखि बाँकीरहेको किस्ता रकम नयाँ व्यवस्थापन आएपछि तिरेको हो । निगमले पछिल्लो पटक गत असार ३० गते कर्मचारी सञ्चय कोष र नागरिक लगानी कोषबाट जहाज खरिदका निम्ति लिएको ऋणको किस्ताबापतको रकम तिरेको जनाएको छ ।

निगम कर्मचारीका अनुसार कर्मचारी सञ्चय कोषलाई न्यारोबडी जहाज खरिदवापतको ४५ करोड र वाइडबडी जहाज खरिदवापतको ४५ करोड गरी जम्मा ९० करोड किस्तावापतको रकम भुक्तानी गरिएको छ । नागरिक लगानी कोषको हकमा पनि वाइडबडी जहाज खरिद गर्दाको ऋण दायित्वको किस्तावापतको ४५ करोड भुक्तानी गरिएको छ ।

विवादका कारण अन्तर्राष्ट्रिय उडानमा सहजता, सीट अकुपेन्सी, गन्तव्य विस्तार आदिको सहज व्यवस्थापन समेत हुन नसकेको कर्मचारीहरु बताउँछन् । यता, पर्यटनमन्त्री श्रेष्ठ भने ग्राउण्डेड भएको जहाज बनाउनुभन्दा निगमका कार्यकारी अध्यक्ष अधिकारी हटाउनमा मात्रै केन्द्रित देखिएका छन् । उनलाई हटाएमात्रै निगममा चलखेल गर्नसकिने भन्दै नयाँ कार्यकारी अध्यक्षको खोजीमा लागेका छन् ।

अधिकारीलाई हटाएर नयाँ कार्यकारी अध्यक्ष ल्याउँदा चुनाव खर्च उठाउन सहज हुने उनको मनसाय छ । तर, अधिकारी हटाउन मन्त्री श्रेष्ठलाई सहज छैन् । अधिकारी उनकै पार्टी नेकपा समाजवादीका सम्मानित नेता झलनाथ खालले सिफारिस गरेका व्यक्ति हुन् ।

उनले खनाललाई रामै नजराना चढाएर नेपाल वायुसेवा निमको कार्यकारी अध्यक्षको पद हात पारेको विषय यसअघि नै सार्वजनिक भइसकेको छ । निगमबारे नेपालबहसले जानकारी लिन खोज्दा कार्यकारी अध्यक्ष अधिकारीले आफुलाई डेँगु भएको र अहिले बोल्न नसक्ने बताए ।

पर्यटनमन्त्री श्रेष्ठ र निगम संचालक समितिबीच संस्था सुधारका विषयमा सामान्य छलफलसमेत भएको छैन । कर्मचारीका अनुसार जहाज ग्राउण्डेड भएपछि निगमको बोर्ड बैठक दुई पटक बसिसकेको छ । तर, उनले त्यसमा चासो दिएनन् । उनी कार्यकारी अध्यक्ष अधिकारीले निगमलाई अधोगतिमा लगेको भन्दै आरोप लगाएर बसिरहेका छन् ।

कार्यकारी अध्यक्ष अधिकारीको असक्षमताका कारण जहाज मर्मत हुन नसकेको र अधिकारीकै कारण निगमको साख खस्किँदै गएको पर्यटनमन्त्री श्रेष्ठको भनाइ छ । निगममा नयाँ नियुक्ति नभएसम्म आर्थिक अवस्थामा सुधार नआउने श्रेष्ठको बुझाइ छ । मन्त्री श्रेष्ठ र अधिकारीबीचको लफडाले निगमलाई लथालिंग बनाउने काम भइरहेको कर्मचारीहरु बताउँछन् ।

निगम कर्मचारीका अनुसार दाहिने पट्टीको इन्जिनमा समस्या आएपछि न्यारोबडी जहाज ग्राउण्डेड भएको थियो । आठ महिनाअघि इन्जिन फेल भएर ग्राउण्डेड भएको ९ एन–एकेडब्लु कलसाइनको यो न्यारोबडी जहाजको दाहिने पट्टीको इन्जिनमा समस्या आएको छ । न्यारोबडी जहाज निगमले सात वर्षअघि खरिद गरेको हो । सात हजारभन्दा बढी साइकल पार गरेको यो इन्जिनले करिब १९ हजार फ्लाइङ आवर पार गरिसकेको कर्मचारीको भनाई छ ।