मतदातालाई रुख चिह्नमा मतदान गर्ने वातावरण मिलाउन देउवालाई जिल्ला सभापतिहरूको दवाव

२३ भदौ, काठमाडों ।  सत्ता गठबन्धनमा सीट बाँडफाँडको विषय पेचिलो बनिरहेका बेला प्रधानमन्त्रीसमेत रहेका कांग्रेस सभापति शेरबहादुर देउवालाई सबै निर्वाचन क्षेत्रका मतदाताले रुख चिह्नमा मतदान गर्न पाउने वातावरण बनाउन दवाव परेको छ ।

नेपाली कांग्रेसका जिल्ला सभापतिहरुले आगामी निर्वाचनमा सबै मतदाताले रुखमा भोट हाल्न पाउनुपर्ने माग गर्दै सभापति देउवालाई दवाव दिएका छन् । बिहीबार बिहान जिल्ला सभापतिहरुले प्रधानमन्त्री तथा पार्टी सभापति देउवालाई भेटेर सबै ठाउँका मतदाताले प्रत्यक्षतर्फ नै रुख चुनाव चिह्नमा मतदान गर्न पाउनुपर्ने माग गरेका हुन् ।

सत्ता गठबन्धन दलबीच चुनावी तालमेल हुँदा सिटको बाँडफाँट हुने र कतिपय सिट अन्य पार्टीहरुलाई दिनुपर्ने अवस्था रहेकोमा कांग्रेस सभापतिहरुले संघ नपाए सम्बन्धित संघीय क्षेत्रका दुवै प्रदेशसभा क्षेत्र कांग्रेसले राखेर सिटको बाँडफाँट हुनुपर्ने माग राखेका छन् ।

धादिङ जिल्ला सभापति रामनाथ अधिकारीले प्रदेशका १३ वटै जिल्ला सभापतिहरुको तर्फबाट आफूले सभापति देउवालाई ज्ञापन पत्र बुझाएको जानकारी दिए । उनले मतदाताले मतपत्रमा प्रत्यक्षतर्फ नै रुख चुनाव चिन्ह रोज्न पाउनुपर्ने भन्दै रुख चुनाव चिह्नबिनाको मतपत्र हुनु पार्टीका लागि राम्रो नहुने बताए । सबै क्षेत्रका जनताले कांग्रेसलाई रोज्न पाउनुपर्ने माग सभापतिसमक्ष राखेको आधिकारीको भनाइ छ ।

गठबन्धन हुँदा कांग्रेसले चितवन–३, धादिङ–१, सिन्धुपाल्चोक–१, काभ्रे–१, काठमाडौं–२, काठमाडौं–८, रामेछाप, मकवानपुर–१, नुवाकोट–१ र ललितपुर–१ अन्य दललाई छोड्नुपर्ने अवस्था छ । जिल्ला सभापतिहरुले ती क्षेत्रमा संघमा गठबन्धनका अन्य दलबाट उम्मेदवार भए प्रदेशका दुवै क्षेत्र काग्रेसले आफ्नो भागमा राख्नुपर्ने माग उनीहरुले गरेका छन् ।

भेटमा कुनै पनि क्षेत्रमा कांग्रेसका उम्मेदवार नहुने अवस्था आउन नदिन आग्रह गरेको दोलखा सभापति बर्मा लामाले बताए । उनले प्रदेश क्षेत्र अन्य दलले मागे कांग्रेसले संघ छोड्न नहुने भन्दै संघ अन्य दलले मागे कांग्रेसले प्रदेशसभाका दुवै क्षेत्र आफ्नो भागमा राख्नुपर्ने बताए । वाग्मती प्रदेशमा प्रतिनिधिसभाका ३३ र प्रदेशसभाका ६६ निर्वाचन क्षेत्र रहेका छन् ।