प्रत्यक्षतर्फको निर्वाचन कार्यक्रम स्वीकृत

२४ भदौ, काठमाडौं । निर्वाचन आयोगले पहिलो हुने निर्वाचित हुने(प्रत्यक्ष)तर्फको मनोनयन दर्ता असोज २३ गते बिहान १० बजेदेखि पाँच बजेसम्म हुने गरी निर्वाचन कार्यक्रम स्वीकृत गरेको छ । आयोग पदाधिकारीको बिहीवार बसेको बैठकले निर्वाचन कार्यक्रम स्वीकृत गरेको हो ।

स्वीकृत कार्यक्रम बमोजिम प्रत्यक्षतर्फको गतिविधि असोज २३ गते सुरु भई मंसिर ४ गते मतदानसँगै टुङ्गिनेछ । आयोगले असोज २३ गते मनोनयन दर्ता भएको उम्मेदवारको सूची साँझ सात बजेभित्र प्रकाशन गरिनेछ । असोज २४ गते उम्मेदवारको विरोधमा उजुरी दिने, असोज २५ गते मनोनयन पत्र र उजुुरी उपर जाँचबुझ गरी निर्णय गर्ने, असोज २५ गते उम्मेदवारको नामावली प्रकाशन गरिनेछ ।

आयोगका अनुसार २६ गते उम्मेदवारी फिर्ता लिने र सोही दिन अन्तिम नामावली प्रकाशन गरी निर्वाचन चिह्न प्रदान गर्ने कार्यक्रम तय गरिएको छ । स्वीकृत कार्यक्रम अनुसार मङ्सिर ४ गते बिहान सात बजेदेखि पाँच बजेसम्म मतदान हुनेछ ।