आईजीपी मुलुकबाहिर भएका बेला २ सय ४० गाडी किन्न टेण्डर आह्वान

२४ भदौ, काठमाडौं । हतियार खरिदमा विवादित बनेको नेपाल प्रहरी निर्वाचन सुरक्षा प्रयोजनका गाडी खरिद गर्ने क्रममा थप विवादित बन्ने देखिएको छ । सरकार–सरकार ‘जीटुजी’ मार्फत खरिद गर्न लागिएको गाडीलाई नेपाल प्रहरी र सशस्त्र प्रहरीले टेण्डर निकालेर खरिद प्रकृया अघि बढाएका छन् ।

चार दिन अघि नै टेण्डर आह्वान गरेर २ सय ४० गाडी टेण्डरमार्फत खरिद गर्न लागिएकाे हाे । गृह मन्त्रालयले जिटुजीको प्रकृया पूरा गर्न समय लाग्ने भएकाले टेण्डरमार्फत खरिद गर्न निर्देशन दिएपछि प्रहरी महानिरीक्षक धीरजप्रताप सिंह र राजु अर्याल नेपाल बाहिर रहेका बेला व्यापारिक फर्ममार्फत नै खरिद प्रकृया शुरु गरेको छ ।

दुवै आईजीपी अहिले अमेरिका भ्रमणमा रहेका छन् । यही बेला टेण्डर प्रकृयामार्फत नेपाल प्रहरीले १८० र सशस्त्र प्रहरीले ६० वटा गाडी किन्ने भएका छन् । ‘अहिलेलाई व्यापारिक फर्ममार्फत खरिद गर्न निर्देशन आयो, त्यही अनुसार सूचना प्रकाशन भैसकेको छ’, नेपाल प्रहरीका एक उच्च अधिकारीले भने । उनका अनुसार जिटुजीमार्फत ल्याउदा कम लागत पर्ने भएपनि मन्त्रालयले यो प्रकृयामा रुची देखाएन । अर्थ मन्त्रालयले नेपाल प्रहरीलाई गाडी खरिदका लागि ७५ करोड रकम छुट्याएको छ ।

अर्थले नै प्रतिगोटा ५० लाखमा नबढ्ने गरी खरिद गर्न अनुमति दिएपछि प्रहरीले सोही अनुसार टेन्डर आह्वान गरेको छ । प्रहरीले १५ दिने सूचना जारी गर्दै खरिद प्रक्रियाका लागि आवेदन माग गरेको हो । नेपाल प्रहरीले दुई प्रकारका गाडी खरिद गर्ने भएको छ । प्रहरीले ५० लाख रुपैयाँ गोटाका ८० वटा र ३५ लाख रुपैयाँका दरले १०० वटा गाडी खरिदका लागि सूचना जारी गरेको छ । ‘गाडी खरिद प्रकृया अघि बढेको छ’, प्रहरी प्रवक्ता डीआईजी टेकप्रसाद राइले भने । खरिद प्रकृया दुवै प्रहरीको प्रबन्ध शाखाले गर्नेछन् । नेपाल प्रहरीको प्रबन्ध शाखामा डीआईजी दीपक थापा छन् भने सशस्त्र प्रहरीमा प्रधानमन्त्रीका स्वकीय सचिव भानु देउवाका बहिनी ज्वाई दीपेन्द्र कुँवर रहेका छन् ।

सशस्त्र प्रहरीले पनि ६० वटा गाडी निर्वाचनअघि नै खरिद गरिसक्ने भएको छ । सरकारले सशस्त्र प्रहरीलाई गाडी किन्न २५ करोड रुपैयाँ दिएको छ । नेपाल प्रहरीकै मापदण्डका गाडी किन्न सशस्त्रलाई पनि भनिएको छ । सोही अनुसारको खरिद प्रकृया अघि बढेको हो ।

सशस्त्र प्रहरीले ५० लाखका दरले २५ वटा र ३५ लाख दरका ३५ वटा गाडी खरिद गर्ने भएको छ । यसका लागि सशस्त्रले पनि सूचना निकालिसकेको छ । खरिद गर्ने कम्पनीले नै गाडीमा प्रहरीका लागि आवश्यक रंगरोगन र अन्य सबै सामान जडान गर्नु पर्ने सो सूचनामा उल्लेख छ । त्यसैगरी गृह मन्त्रालयले २५ वटा गाडी किन्ने भएको छ । गृहले ५० लाख रुपैयाँ प्रतिगोटाका गाडी किन्न लागेको स्रोतको दावी छ ।