युथ टेबल गर्दै कांग्रेसका युवा उम्मेदवार

२५ भदौ, पोखरा । प्रदेश तथा प्रतिनिधिसभामा भेला भएका कांग्रेसका युवा उम्मेदवारहरुले आसन्न चुनावमा युवाहरुको सहभागिता बढाउन दबाब दिने कार्यक्रम स्वरुप पोखरामा युथ टेबल गर्ने भएका छन ।

यो कार्यक्रममा प्रदेशका ११ जिल्लाबाट प्रतिनिधिसभा तथा प्रदेशसभामा सिफारिस भएका युवा उम्मेदवारहरु सहभागी हुनेछन । त्यहाँ उनीहरुले आफ्नो लिखित तथा मौखिक प्रस्तुतीमार्फत युवाका एजेण्डा र कांग्रेसले लिनुपर्ने अबको बाटोको बारेमा छलफल गर्नेछन ।

११ जिल्लाका १८ प्रतिनिधीसभा तथा ३६ प्रदेशसभामा सिफारिस भएका सबै युवा उम्मेदवारहरु आपसी भेला गर्ने सहमति अनुरुप कार्यक्रम तय भएको अजित क्षेत्रीले बताए । उनी पनि स्याङजा कांग्रेसबाट सिफारिस भएका उमेदवार हुन ।

आइतबार बिहान ११ बजे पोखरामा हुने यो कार्यक्रममार्फत कांग्रेसमा युवाहरुको प्रभावकारी उपस्थितीको बारेमा छलफल हुने, पार्टीमा युवाहरुलाई स्थान दिन दबाब दिने र घोषणापत्रमा समेट्नुपर्ने विषयमा छलफल हुने उनले जानकारी दिए ।

ठुलो पार्टी भएतापनि नेतृत्वमा र टिकट पाउने बेलामा चाहिँ युवाहरुलाई पछाडि पारिँदा स्वतन्त्र युवाहरुले जित्ने अवस्था आएको र यसमा पार्टीले युवा उमेदवार अगाडि नसारेकै कारण पार्टीलाई नोक्सान भएको उनीहरुको ठहर छ ।

“स्वतन्त्र चम्किने, कांग्रेसका युवा कहिलेसम्म थन्किने”, “परिवर्तनका निम्ति युवा”,
“सक्षम युवा, एजेण्डा सहित” लगायतका नाराहरु उनीहरुले तय गरेका छन ।”

पार्टीले युवालाई अगाडि नबढाउँदा देशमा स्वतन्त्रको लहर आएको र त्यसबाट पार्टीलाई नै नोक्सान हुने हुँदा आसन्न संसदीय निर्वाचनमा युवाहरुलाई प्राथमिकता दिनुपर्ने सन्देश उनीहरुले युग टेबलमार्फत दिनेछन ।

कार्यक्रममा सिफारिस भएका हरेक युवाहरुलाई बोल्ने समय दिइनेछ । उमेदवारले आफ्नो प्राथमिकता राख्नेछन । सहयोगको प्रतिबद्धता पनि जनाउनेछन । कांग्रेसले के लाई प्राथमिकतामा राख्नुपर्छ भनेर छलफल हुनेछ, लिखित सुझा, एजेण्डा पनि राख्नेछन ।