डीएनए परीक्षणका लागि बलात्कारका आरोपित श्रेष्ठ काठमाडौं पुगे

२७ भदौ, काठमाडौं। डीएनए टेष्ट गराउन बलात्कारका आरोपित शिवराज श्रेष्ठ काठमाडौँ आइपुगेका छन् । आइतबार धनुषाबाट काठमाडौं आई श्रेष्ठले राष्ट्रिय विधिविज्ञान प्रयोगशाला, खुमलटारमा डीएनएका लागि रगतको नमुना दिएका हुन् । निहारिका भनिने सोनाली कुमारी सिंहले जबरदस्ती करण गरेको दाबी गर्दै पछिल्लो तीन वर्षदेखि न्यायका लागि भौतारिदै आएकि छन् ।

उनीबाट जन्मेका बालकसँग करणिको आरोप लागेका श्रेष्ठको रगतको नमूना परीक्षण गरिनेछ। आफूलाई जबरजस्ती करणी गरी गर्भवती बनाएको र अहिले बिचल्ली पारेको आरोप लगाउँदै निहारिकाले दिएको जाहेरीका आधारमा धनुषा जिल्ला अदालतमा दर्ता भएको मुद्दामा अदालतले जबरजस्ती करणी होइन भन्ने फैसला गरेको थियो । फैसलामा राजीखुशीमै यौनसम्बन्ध स्थापित भएको देखिएको र निहारिकाले नै शिवराजलाई आफ्नो पति भनेको कारण जबरजस्ती करणी होइन भन्ने फैसलामा उल्लेख थियो ।

उच्च अदालतले डीएनए टेष्टका लागि आदेश दिएसँगै श्रेष्ठ आइतबार डीएनए टेष्टका लागि काठमाडौं आएका हुन् । विधिविज्ञान प्रयोगशालामा निहारिका पनि बच्चासहित पुगेकी थिइन् । डीएनए टेष्ट गर्दा बालकसँग मिलेमा श्रेष्ठविरुद्ध जबरजस्ती करणी ठहर हुनुपर्ने निहारिकाले माग गर्दै आएकी छिन् ।