गठबन्धन भए काठमाडौंका ९ वटा निर्वाचन क्षेत्र एमाले बिहीन हुने, एक सीटमा बलियो

२७ भदौ, काठमाडौं । आगामी मंसिर ४ मा हुने प्रदेश र प्रतिनिधिसभा सदस्यको निर्वाचन अन्र्तगत संघीय राजधानीसमेत रहेको काठमाडौका अधिकांश निर्वाचन क्षेत्रमा सत्ता नेतृत्व गरिरहेको नेपाली कांग्रेस बलियो देखिएको छ । निर्वाचन नजिकिएसँगै विभिन्न क्षेत्रका अघिल्ला मतपरिणमहरुलाई लिएर दलहरुले आफ्ना धारणा र रणनीति सार्वजनिक गरिरहेका छन् ।

संघीय राजधानी रहेको काठमाडौ जिल्लामा १० निर्वाचन क्षेत्र रहेका छन् । २०७४ को निर्वाचनमा नेकपा एमाले र नेकपा माओवादीबीच पार्टी एकीकरण गर्ने भन्दै गठबन्धन भएपछि अघिल्ले निर्वाचनमा पाएको नतिजाभन्दा खस्किएको थियो । केही क्षेत्रमा कम्युनिष्ट गठबन्धन हुँदा पनि कांग्रेस झिनो मतान्तरले पराजित भएको थियो ।

यस पटकका निर्वाचनमा कांग्रेस एक्लै लडदा पनि काठमाडौका १० क्षत्रमध्ये ८ वटा निर्वाचन क्षत्रमा सहजै जित निकाल्न सक्ने देखिएको नेताहरुले बताएका छन् । तर, सत्ता गठबन्धनका कारण काठमाडौका केही जित्नसक्ने क्षेत्रहरु छाड्नुपर्ने भएकाले कांग्रेसलाई घाटा हुने देखिएको छ । कांग्रेसभित्र आफुले जित्न सक्ने क्षेत्र अरुदललाई नदिन दवाव पनि बढीरहेको छ ।

 निर्वाचन आयोगको विवरण अनुसार यस्तो छ १० क्षेत्रको अंकगणित

काठमाडौं क्षेत्र नं १ मा कांग्रेस बलियो

पछिल्लो समय काठमाडौ क्षेत्र नं १ नेपाली कांग्रेसका नेता प्रकासमान सिंहको पेवा जस्तै भएको छ । सिंह २०७४ सालको निर्वाचनमा काठमाडौं १ बाट निर्वाचित भएका थिए । कांग्रेसका नेता प्रकाशमान सिंह १० हजार ९३६ मत ल्याएका थिए । उनका प्रतिद्वन्द्वी विवेकशील साझाका रवीन्द्र मिश्रले १० हजार ११८ मत पाएका थिए । यो निर्वाचन क्षेत्रलाई एमालेले कडा प्रतिष्पर्धा हुने क्षेत्रको रूपमा लिएको छ ।

स्थानीय तहको मतपरिणाम हेर्दा यो क्षेत्रमा एमाले दोस्रो शक्तिका रूपमा रहेको छ । एमालेका वडाध्यक्षहरूले कुल ९ हजार ५४१ मत पाएका छन् भने कांग्रेसका उमेदवारले ९ हजार ८९५ मत पाएका छन् । माओवादी केन्द्रले एक हजार १५९ मत पाएको छ । जसपाको मत २६ मात्रै छ । यो क्षेत्रमा गठबन्धन १ हजार १८० मत अगाडी छ । यहाँ राप्रपाको १ हजार १५९ मत छ । एमाले र राप्रपाबीच चुनावी तालमेल भएपनि एमालेको पक्षमा १० हजार ७ सय २१ मत हुने देखिन्छ । संघीय निर्वाचन स्थानीय भन्दा फरक हुने भएकाले यो क्षेत्रमा कांग्रेसकै सम्भावना बलियो रहनेछ ।

काठमाडौं क्षेत्र न. २ मा गठबन्धन नभए एमाले बलियो

काठमाडौं क्षेत्र नं २ २०७४ को निर्वाचनमा एमालेको उम्मेदवार माधवकुमार नेपाल विषयी भएका थिए । अहिले पनि उनैले यो क्षत्रमा दावी गरिरहेका छन् । गठबन्धन भएमा यो क्षेत्रमा एमाले पराजित हुनेछ । माओवादीसँगको गठबन्धनमा एमालेका तत्कालीन वरिष्ठ नेता माधवकुमार नेपाल निर्वाचित भएका थिए ।

नेपालले २७,३६६ मत पाउँदा कांग्रेसका दीपकप्रसाद कुँइकेलले १४ हजार ९०३ मत ल्याएका थिए । एमालेले यो निर्वाचन क्षेत्रलाई सहजै जित्ने क्षेत्रको रूपमा दाबी गरेको छ । स्थानीय निर्वाचनमा एमालेले यो क्षेत्रमा १७ हजार ३२८ मत पाएको छ भने कांग्रेसले १४ हजार १२८, माओवादीले तीन हजार १३१, एकीकृत समाजवादीले ७ हजार ९११ र जसपाले १२९ मत पाएको छ ।

यो क्षेत्रमा गठबन्धनको उम्मेदवारको पक्षमा कुल २५ हजार २९९ मत हुन आउँछ । यो एमालेभन्दा ७ हजार ९७१ ले बढी हो । यो क्षेत्रमा राप्रपासँग २ हजार ७०० र लोसपासँग ८ मत छ । यदी एमालेलाई राप्रपाले सहयोग गरे पनि गठबन्धन नै बलियो देखिन्छ । तर, गठबन्धन नभएमा एमाले बलियो हुनेछ ।

काठमाडौंको क्षेत्र न.३ मा कांग्रेस बलियो

२०७४ मा ४५ सयभन्दा बढी मतान्तर एमालेले जितेको यो क्षेत्रमा अहिले कांग्रेस बलियो देखिएको छ । गठबन्धन नगरी कांग्रेस एक्लै गएपनि यो क्षेत्रमा एमालेका उम्मेदवारले विजय हासिल गर्न कठिन देखिएको छ । गठबन्धन भएमा यो क्षेत्रबाट गठबन्धनका उम्मेदवारले सहजै जित निकाल्ने देखिएको छ । अघिल्लो प्रतिनिधिसभा निर्वाचनमा यो क्षेत्रबाट एमालेका कृष्ण राईले १९ हजार १६९ मत ल्याएर निर्वाचित हुँदा कांग्रेसका अम्बिका सिग्देलले १४,८८४ मत ल्याएकी थिइन् ।

गएको स्थानीय निर्वाचनको परिमाण हेर्दा एमालेका वडाध्यक्षका उमेदवारहरूले १४ हजार ८७६ मत पाएका छन् भने कांग्रेसले १५ हजार ७९५, माओवादीले १ हजार ७३० मत, एकीकृत समाजवादीका वडाध्यक्षका उमेदवारले १० मत पाएका छन् । गठबन्धनमा रहेका यी दलहरूको कुल मत १७ हजार ५३५ हुन आउँछ । जुन एमालेको भन्दा दुई हजार ६५९ मत बढी हो । यहाँ राप्रपाका वडाध्यक्षले १ हजार ३१४ मत पाएका थिए । यहाँ एमालेले राप्रपाकै साथ पाए पनि गठबन्धन बलियो देखिन्छ ।

काठमाडौं क्षेत्र नं ४ मा कडा टक्कर

यो क्षेत्र नेपाली कांग्रेसका महामन्त्री गगनकुमार थापा निर्वाचित क्षेत्र हो । कांग्रेसका महामन्त्री गगन थापा २५ हजार ५५८ मत ल्याएर निर्वाचित भएका थिए । उनीसँग एमालेका राजन भट्टराई १८ हजार १४० मत ल्याएर पराजित भएका थिए । स्थानीय तहको हेर्दा यहाँ एमालेले १६ हजार ५०७ मत पाएको छ । त्यस्तै कांग्रेसले १५ हजार ७६३, माओवादीले ८८४ मत पाएको थियो । एकीकृत समाजवादीले २ हजार ४१४, जसपाले ३१७ मत प्राप्त गरेको निर्वाचन आयोगको नतिजाले देखाउँछ । यहाँ गठबन्धनसँग १९ हजार ३३८ मत हुन आउँछ । जुन एमालेभन्दा २ हजार ८३१ मतबढी हो । यो क्षत्रमा राप्रपाले २ हजार २९३ मत पाएको छ ।

काठमाडौं क्षेत्र नं ५ मा एमाले बलियो

नेकपा एमालेका हालका वरिष्ठ उपाध्यक्ष इश्वर पोखरेल निर्वाचित यो क्षेत्रमा अहिले पनि गठबन्धनभन्दा एमाले बलियो देखिएको छ । २०७४ को निर्वाचनमा पोखरेलले २३ हजार २९ मत पाएका थिए । स्थानीय निर्वाचनमा पनि एमालेको मत गठबन्धनको भन्दा बढी छ । काठमाडौंमा गठबन्धन भन्दा धेरै मत रहेको क्षेत्र यो मात्रै हो ।

यो निर्वाचन क्षेत्रमा स्थानीय निर्वाचनमा एमालेले १९ हजार ७०३ मत पाउँदा कांग्रेसले १४ हजार ८५३ मत पाएको छ । माओवादीले १ हजार १६८ र एकीकृत समाजवादीले १ हजार ८२७ मत पाएका छन् । यहाँ गठबन्धनसँग १७ हजार ८८३ मत हुन आउँछ । जुन एमालेको भन्दा १ हजार ८२० मत कम हो । यहाँ राप्रपाले वडा तहमा २ हजार ८२२ रहेकाले यो क्षेत्रमा एमाले पक्का जस्तै छ ।

काठमाडौं क्षेत्र नं ६ मा कांग्रेस बलियो

काठमाडौं क्षेत्र नं ६ कांग्रेस एक्लैले पनि सहज जित निकाल्ने क्षेत्र हो । अघिल्लो निर्वाचनमा कांग्रेसका भीमसेनदास प्रधान १६ हजार ७८५ मतसहित निर्वाचित भएका थिए । उनका प्रतिष्पधी माओवादीका झक्कुप्रसाद सुवेदीले १५ हजार ४८५ मत ल्याएका थिए । सुवेदी एमाले र माओवादी गठबन्धनका उमेदवार थिए । मंसिर ४ को निर्वाचनमा यो क्षेत्रमा कांग्रेसको पकड बलियो दखिएको छ ।

स्थानीय चुनावको नतिजा हेर्दा काठमाडौं ६ मा एमालेका वडाध्यक्षका उमेदवारहरूले १४ हजार ३०३ मत ल्याएका थिए भने कांग्रेसले १७ हजार २७७ मत ल्याएको छ । माओवादीले २ हजार ४६२ मत पाएको छ । एकीकृत समाजवादीका वडाध्यक्षले १ हजार ८५९ मत पाएका थिए । निर्वाचन क्षेत्रमा गठबन्धन दलसँग कुल २१ हजार ५९८ मत हुन आउँछ । एमालेभन्दा गठबन्धन दलसँग ७ हजार २९५ मत बढी देखिन्छ । यहाँ राप्रपाका वडाध्यक्षले १ हजार ८१६ मत ल्याएका छन् । राप्रपाले एमालेलाई साथ दिएमा पनि एमाले मतका हिसाबले कमजोर देखिन्छ ।

काठमाडौं क्षेत्र नं ७ मा कांग्रेस बलियो

२०७४ को प्रतिनिधिसभा निर्वाचनमा यो क्षेत्रमा कांग्रेसको उम्मेदवार थिएन । एमालेका रामवीर मानन्धर १८ हजार १०२ मतसहित निर्वाचित भएका थिए । उनका प्रतिष्पर्धी राप्रपाका विक्रमबहादुर थापाले १० हजार ७९ मत ल्याएका थिए । स्थानीय निर्वाचनको मतअनुसार एमालेको १२ हजार २०२ मत छ भने कांग्रेसको १४ हजार १६७ मत छ ।

गठबन्धनमा रहेका माओवादी ५७६ र एकीकृत समाजवादीका वडाध्यक्षले ३८ मत पाएका छन् । जसपाका वडाध्यक्षले १९८ मत पाएका थिए । राप्रपाको वडाध्यक्षले २ हजार २७ मत ल्याएका छन् । यहाँ राप्रपाले एमालेलाई सहयोग गरेको खण्डमा पनि एमालेसँग १४,२०२ मत हुन आउँछ । त्यसो भएमा कांग्रेसँग ७५० मत बढी देखिन्छ ।

काठमाडौं क्षेत्र नं ८ मा कांग्रेस बलियो

यो निर्वाचन क्ष्षेत्रमा पनि एमालेभन्दा कांग्रेस एक्लै बलियो देखिएको छ । अघिल्लो निर्वाचनमा एमालेबाट जीवनराम श्रेष्ठ १३ हजार ३९७ मतसहित निर्वाचित भएका थिए । उनका प्रतिष्पर्धी कांग्रेसका नविन्द्रराज जोशीले १२ हजार ९५३ मत पाएका थिए । यतिबेला श्रेष्ठ एकीकृत समाजवादीमा छन् । यो निर्वाचन क्षेत्रमा एमालेको ९ हजार २३५ मत र कांग्रेसको १० हजार ८७२ मत रहेको छ । माओवादीले १८९, एकीकृत समाजवादीले ५ हजार १४२ र जसपाले ९७ मत पाएको छ । स्थानीय चुुनावको मत हेर्दा गठबन्धनले १६ हजार ३०० मत छ । जुन एमालेको मत भन्दा ७ हजार ६५ मत बढी हो ।

काठमाडौं क्षेत्र नं ९ मा कडा टक्कर

यो निर्वाचन क्षेत्रमा यो पटक कांग्रेस र एमालेबीच कडा प्रतिस्पर्धा हुने देखिन्छ । अघिल्लो निर्वाचनमा एमालेका कृष्णगोपाल श्रेष्ठले २२ हजार ८ ५२ मत पाएर निर्वाचित भएका थिए । उनका प्रतिष्पर्धी कांग्रेसका ध्यान गोविन्द रञ्जितले १४ हजार ८०२ मत ल्याएका थिए । स्थानीय निर्वाचनको परिणाम अनुसार यो निर्वाचन क्षेत्रमा एमालेको १९ हजार २ सय ८२ मत छ भने कांग्रेसको १९ हजार ९१६ मत रहेको छ ।

माओवादीले ६९५, एकीकृत समाजवादीले ४६५ र जसपाले ९२ मत पाएका छन् । गठबन्धनसँग २१ हजार १६८ मत हुँदा एमाले र राप्रपाबीच तालमेल भए गठबन्धनभन्दा एमाले बलियो हुन आउँछ ।

काठमाडौँ क्षेत्रं नं १० मा कांग्रेस बलियो

यो निर्वाचन क्षेत्रबाट लगातार कांग्रेका उम्मेदवार विजयी हुँदै आएका छन् । २०७४ को प्रतिनिधिसभा निर्वाचनमा कांग्रेसका राजन केसी २४ हजार १९० मतसहित निर्वाचित भएका थिए । उनका प्रतिष्पर्धी माओवादी केन्द्रका हितमान शाक्यले २१ हजार ९०७ मत ल्याएका थिए । स्थानीय तहको निर्वाचनमा एमालेले १८ हजार ८३८ मत पाएको छ ।

गठबन्धनमा रहेका दल कांग्रेसको मत २४ हजार ६७५, माओवादले ४,९४२ मत पाएको छ । त्यस्तै एकीकृत समाजवादीसँग १ हजार ३४२ , जसपासँग २५४ मत छ । यहाँ गठबन्धनको मत हिसाब गर्दा ३१ हजार ४६७ मत छ । यो एमालेभन्दा १२ हजार ६२९ मत बढी हो । यहाँ राप्रपासँग २ हजार ४९६ मत छ । यहाँ कांग्रेस एक्लैलाई पनि एमालेले भ्याउन सक्दैन् ।