१२ कम्पनी कालोसूचीमा, ठेक्का प्रकृयामा सहभागी हुन नपाउने

२७ भदौ, काठमाडौं । सार्वजनिक खरिद अनुगमन कार्यालयले १२ वटा निर्माण कम्पनीलाई कालोसूचीमा राखेको छ । कार्यालयले आज एक सूचना जारी गर्दै पटक–पटक ताकेता गर्दा पनि समयमा काम सम्पन्न नगर्ने कम्पनीहरूलाई कालोसूचीमा राखेको जनाएको हो ।

कार्यालयले धैर्यता निर्माण उद्योग, हर्कदेवी बिल्डर्स, देवेन्द्र तेल उद्योग, प्यासिफिक कन्स्ट्रक्सन एण्ड कन्सल्टेन्सी, पृथ्वी कन्स्ट्रक्सन, रन्नुभन्न कन्स्ट्रक्सन कालोसूचीमा राखेको छ । त्यसैगरी, रोज कन्स्ट्रक्सन, सानोभेरी निर्माण सेवा, च्याङला कन्स्ट्रक्सन, सुन्दरी निर्माण सेवा, किसान रक्तकाली पावर क्वालिटी जेभी र लामा बिल्डर्स कम्पनी समेत कालोसूचीमा परेका छन् ।

सार्वजनिक खरिद अनुगमन कार्यालयले कालोसूचीमा राखेका कम्पनीहरूले ठेक्का प्रक्रियामा सहभागी हुन पाउने छैनन् । यीमध्ये अधिकांश कम्पनीहरू सडक निर्माणको क्षेत्रमा संलग्न छन् । ठेक्का लिएर वर्षौंसम्म काम पुरा नगरी योजना अलपत्र पार्ने, कमसल निर्माण गर्ने तथा लामो समयसम्म योजना होल्ड गरी लागत मूल्य बढाउन दबाब दिने कार्यमा संलग्न छन् । यी कम्पनीहरूलाई एक वर्षदेखि एक वर्ष छ महिनासम्मका लागि कालोसूचीमा राखिएको हो । कालोसूचीमा पर्ने अधिकांश कम्पनीले गाउँपालिका, नगरपालिका, काठमाडौं उपत्यका विकास प्राधिकरण, शहर विकास तथा भवन निर्माणको योजना लिएर अलपत्र पारेको हो ।