सनराइज बैंकले मुद्वती खातामा १४.१३ र बचतमा १०.१३ प्रतिशत ब्याज दिने

३१ भदौ, काठमाडौं । सनराइज बैंकले रेमिट्यान्स मुद्वती खातामा १४.१३ प्रतिशत ब्याज उपलब्ध गराउनुका साथै ब्यतिगत मुद्वतीमा १२.१३ प्रतिशत ब्याज दिने भएको छ । यसका अलाबा रेमिट्यान्स बचत खातामा १०.१३ प्रतिशत ब्याजका साथै साधारण बचतमा ७.१३ प्रतिशत र सम्र्पुण बचत नामक खातामा ९.१३ प्रतिशत ब्याज दिने बैंकले जनाएको छ ।

यो ब्याजदर आश्विन १ गतेबाट लागु हुनेछ । साथै बैंकले ५, १० र १५ गुणाको प्रतिफल दिने आर्कषक योजना पनि कायमै राखेको छ ।

नेपाल बैंकर्स संघले ६ महिनादेखिको सिन्डिकेट खारेज गर्ने निर्णय गरेसँगै असोज १ बाट लागू हुने गरी ब्याजदर प्रकाशित गरेका बैंक तथा वित्तीय संस्थाले बचतसँगै मुद्दतीको दर बढाएका हुन्। यो ब्याजदर गत ६ महिनादेखि स्थिर थियो ।

राष्ट्र बैंकले चालु वर्षको मौद्रिक नीतिमार्फत ब्याजदर बढाउन चाहे बढाउन सक्ने सकुर्लर गरेपनि लागत बढ्ने भन्दै बैंकहरुले बढाएका थिएनन् । असोजमा भने आधारदर पुनरावलोकन गर्न पाइन्छ। त्यसो हुँदा ब्याजको सिन्डिकेट हटाएर संघले ब्याजदर बढाउने दिशामा निर्णय लिएको हो। यो निर्णयसँगै बचतको ब्याजदर नै दोहोरो अंकमा उक्लिएको छ ।