सिरियाको हैजा नियन्त्रणबाहिर छैन– स्वस्थ्य मन्त्री

२ असोज एजेन्सी ।  सिरियाली सरकारले यहाँका विभिन्न भागमा फैलिएको हैजा नियन्त्रणबाहिर नरहेको बताएको छ । सिरियाली स्वास्थ्य मन्त्री हसन–अल घबासले यहाँस्थित संयुक्त राष्ट्रसङ्घीय प्रतिनिधि र अन्य अन्तर्राष्ट्रिय संस्थाका प्रतिनिधिसँगको भेटका क्रममा शनिबार सो कुराको जानकारी गराए।

सिरियाका विभिन्न स्थानमा हैजाको प्रकोप फैलिएको थियो । त्यसपछि यहाँको सरकारले सफा पानी उपलब्ध गराउनुका साथै सरसफाइका लागि यहाँका नागरिकलाई सचेतनासम्बन्धी कार्यक्रमहरु सञ्चालन गरेकाले यहाँको हैजाको प्रकोप नियन्त्रणभन्दा बाहिर जान नपाएको जानकारी गराए ।

सिरियामा केही दिन यतादेखि हैजाको प्रकोप फैलिएको प्रति संयुक्त राष्ट्रसङ्घका साथै यहाँ कार्यरत विभिन्न अन्तर्राष्ट्रिय संघसंस्थाहरुले चासो राखेपछि उनले सो जानकारी गराएका हुन् ।

गएका केही हप्तादेखि यहाँ हैजाको प्रकोप बढेको थियो । यहाँका केही भूभागमा फैलिएको यो हैजाका ५३ जना संक्रमित भेटिएका थिए । साथै हैजाबाट यहाँका सात जनाको ज्यान पनि गएको सरकारले जनाएको छ ।

यो अवस्था आएपछि संयुक्त राष्ट्रसंघ र यहाँका अन्य संघसंस्थाहरुले हैजाको नियन्त्रणका लागि आवश्यक उपायहरु अपनाउन भनेका थिए ।