पाँच क्षेत्रबाट प्रत्यक्षको सिफारिसमा परेकी प्रधानमन्त्री पत्नी देउवा समानुपातिकको एक नम्बरमा, महामन्त्री शर्मा पुगे निर्वाचन आयोग

३ असोज, काठमाडौं । नेपाली कांग्रेसले प्रधानमन्त्री पत्नी आरजु देउवालाई समानुपातिकतर्फको उम्मेदवार बनाएको छ । उनी समानुपातिकतर्फ एक नम्बरमा परेको बताइएको छ । उनीसँगै सहमहामन्त्रीद्वय फर्मुल्लाह मन्सुर र जीवन परियार तथा पूर्वउपसभापतिद्वय विमलेन्द्र निधि र गोपालमान श्रेष्ठ पनि समानुपातिकमा परेका छन् ।

कांग्रेसले प्रत्यक्षतर्फ पाँच ठाउँबाट सिफारसमा परेकी उनलाई प्रतिनिधिसभामा समानुपातिकतर्फबाट उम्मेदवार बनाएको हो । उनले कुनै पनि निर्वाचन क्षेत्रबाट जित्ने अवस्था नदेखिएपछि समानुपातिकमा राखेको बताइएको छ । कैलाली–५ सहित देशका विभिन्न ५ ठाउँबाट प्रतिनिधिसभामा उम्मेदवारका रूपमा नाम सिफारिस भएपनि अन्तिममा उनलाई प्रधानमन्त्री पत्नी भएकै कारण समानुपातिकमा राखिएको नेताहरुले बताएका छन् ।

यसअघि २०७४ मा आरजु कैलाली–५ बाटै प्रत्यक्ष निर्वाचन लडेकी थिइन् । उनलाई एमालेका नारदमुनि रानाले चुनाव हराएका थिए । मंसिर ४ गते हुने निर्वाचनका लागि निर्वाचन आयोगले आइतबार र सोमबार समानुपातिकतर्फ उम्मेदवारको नाम समेटिएको बन्द सूची बुझाउने मिति तोकेको छ ।

समानुपातिकतर्फ बन्द सूचीलाई अन्तिम रूप दिन अहिले कांग्रेस केन्द्रीय संसदीय समितिको बैठक चलिरहेको छ । एक पदाधिकारीले दिएको जानकारी अनुसार अहिले समितिको बैठक चलिरहेको र निर्वाचन आयोगमा कानुनसम्मत तरिकाले बन्द सूची बुझाउनका लागि महामन्त्री विश्वप्रकाश शर्मालाई आयोग पठाइएको छ । उनी उम्मेदवारको सूची नलिइ निर्वाचन आयोग पुगेका हुन् ।

कानुनबमोजिम प्रतिनिधिसभा र प्रदेशसभामा ४० प्रतिशत सदस्य समानुपातिक निर्वाचन प्रणालीबाट निर्वाचित हुने व्यवस्था छ । जसअनुसार प्रतिनिधिसभाका २७५ मध्ये ११० जना र सातवटै प्रदेशसभामा २२० जना सदस्य समानुपातिकतर्फबाट निर्वाचित हुन्छन् । त्यसैका लागि दलहरुले सोमबारसम्म आ–आफ्नो दलका तर्फबाट आयोगमा उम्मेदवारको सूची दर्ता गर्न लागेका हुन् ।