बन्दसूची पेस गर्ने क्रम जारी, तयारी नै नगरि बन्दसूची बुझाउन आयोग पुगे दलहरु

३ असोज, काठमाडौं। राजनीतिक दलहरुले पूर्व तयारी नै नगरि समानुपातिकतर्फको उम्मेदवारको बन्दसूची बुझाउन निर्वाचन आयोग पुगेका छन् । निर्वाचन आयोगका अनुसार राति दश बजेसम्म मात्र १६ वटा राजनीतिक दलले प्रतिनिधिसभातर्फ उम्मेदवारको बन्दसूची पेस गरेका छन् ।

आयोगले समानुपातिकतर्फ उम्मेदवारको बन्दसूची पेस गर्न दुई दिनको समय उपलब्ध गराएपनि राजनीतिक दलहरुले दोस्रो तथा अन्तिम दिनको अन्तिम समयमा मात्रै सूची पेस गर्न आयोग पुगेको हो । अबेर रातिसम्म राजनीतिक दलहरुले आयोग परिसरमै आ आफ्ना निबासमा रहेका पार्टी नेतृत्वको निर्देशन बमोजिम उम्मेदवारको सूची तयार गर्दैछ ।

सत्ता घटक प्रमुख दल नेपाली काँग्रेस, नेकपा(माओवादी केन्द्र), जनता समाजवादी पार्टीले राति आठ बजेसम्म उम्मेदवारको निक्र्योल गरिसकेको पाइएन । नेपाली काँग्रेसका महामन्त्री विश्वप्रकाश शर्मा आयोगबाट निस्केपछि सहमहामन्त्री जीवन परियार, महेन्द्र यादव लगायतका नेता शीर्ष नेतृत्वको निर्देशन कुर्दै बन्दसूची तयार गर्दै थिए । गत् सोमबार नै उम्मेदवारको टुङगो लगाएको दाबी गरेको नेकपा(एमाले)ले समेत बन्दसूचीका उम्मेदवारको अन्तिम नामावली बेलुकी सबा सात बजेसम्म बुझाएन । नेकपा(एकीकृत समाजवादी)ले पनि बेलुकी सबा सात बजे मात्रै बन्दसूची पेस गर्यो ।

नेकपा(एमाले)बाट बन्दसूची पेस गर्न महासचिव शंकर पोखरेल, विष्णु रिमाल, निरज आचार्य लगायतका नेता पुगेका छन् । नेकपा(माओवादी केन्द्र)बाट महासचिव देव गुरुङ्ग तथा लिलामणि पोखरेल, गिरिराजमणि पोखरेल लगायतका नेता पुगेका छन् ।