राष्ट्रपतिको कदम संविधान असफल बनाउने षड्यन्त्र : वाग्ले

५ असोज, काठमाडौं । संवैधानिक कानुनका जानकार गेजा शर्मा वाग्लेले नागरिकता विधेयक दोस्रो पटक पनि प्रमाणीकरण नगरेर राष्ट्रपतिले असंवैधानिक काम गरेको टिप्पणी गरेका छन् । राष्ट्रपतिको पछिल्लो कदमलाई लिएर आलोचना भइरहँदा संवैधानिक कानुनका जानकार वाग्लेले यस्तो टिप्पणी गरेका हुन ।

राष्ट्रपतिको कदमलाई उनले संविधान नै असफल बनाउने षडयन्त्र भएको बताएका छन् । सामाजिक सञ्जाल ट्वीटरमा वाग्लेले भनेका छन्, ‘सार्वभौम संसद (प्रतिनिधिसभा र राष्ट्रियसभा) ले पारित गरेको नागरिकता विधेयक दोस्रोपटक पनि प्रमाणीकरण नगरेर संविधानको संरक्षक र पालक राष्ट्रपतिबाटै असंवैधानिक काम गरिएको छ । यो विधेयक प्रमाणीकरण नगरिएको मात्रै होइन, संविधानसभाद्वारा बनेको संविधान नै असफल बनाउने संगीन षड्यन्त्र हो ।’

संवैधानिक कानुनका जानकारले राष्ट्रपतिको कदमको आलोचना गरेका छन् भने सत्तापक्ष इत्तरका राजनीतिक दलका नेताहरुले राष्ट्रपतिको कदमलाई संविधान अनुकूल भनेका छन् । संघीय संसदले दोस्रो पटक पठाएको नागरिकता विधेयक संविधानअनुसार १५ दिनभित्र प्रमाणीकरण गर्नुपर्नेमा राष्ट्रपति विद्यादेवी भण्डारीले नगरेपछि उनको कदमको आलोचना भइरहेको छ ।