अनुमति लिएर मात्रै सरुवा, सरुवा भएकालाई तीन दिनभित्र हाजिर हुन आयोगको निर्देशन

६ असोज, काठमाडौं । सरकारले कर्मचारीको सरुवा गर्दा निर्वाचन आयोगको अनुमति अनिवार्यरुपमा लिनुपर्ने भएको छ । अस्थायी मतदाता नामावली सङ्कलन सुरु भएको अवस्थामा कर्मचारीको सरुवा हुँदा नामावली सङ्कलनमा बाधा उत्पन्न हुने भएकोले आयोगले अनुमति लिएर मात्रै सरुवा गर्न सरकारलाई निर्देशन दिएको हो ।

आयोगका प्रवक्ता शालिग्राम शर्मा पौडेलले भने, “मतदाता नामावली सङ्कलनको कार्यमा बाधा पुग्नुका साथै समग्र निर्वाचन ब्यवस्थापनमा प्रतिकूल असर पर्ने हुँदा सरुवा गर्दा अनुमति लिन निर्देशन दिइएको छ ।” आयोगले असोज ५ गतेसम्म सरुवा भएकालाई तत्काल रामाना दिई ९ गतेभित्र हाजिर भइसक्ने व्यवस्था गर्न भनेको छ ।

प्रधानमन्त्री तथा मन्त्रीपरिषद्को कार्यालयमार्फत् आयोगले सबै प्रदेश र स्थानीय सरकारलाई यसप्रकारको निर्देशन दिएको हो । आगामी मङ्सिर ४ गते हुने निर्वाचनका लागि आयोगले असोज ११ गतेदेखि लागू हुने गरी निर्वाचन अधिकृत नियुक्त गर्ने कार्य समेत गरिसकेको छ ।