इंग्ल्याण्डमाथि पाकिस्तानको कीर्तिमानी जित

६ असोज, काठमाडौं । पाकिस्तानले इंग्ल्याण्ड विरुद्धको दोस्रो टी ट्वान्टी खेलमा कीर्तिमानी जित हात पारेको छ । जितसँगै सात खेलको टी ट्वान्टी श्रृखंला १–१ को बराबरीमा आएको छ ।

इंग्ल्याण्डले प्रस्तुत गरेको २०० रनको लक्ष्य पाकिस्तानले खेल सकिन तीन बल बाँकी छँदै बिना कुनै क्षतिमा २०३ रन बनाएर पुरा गर्यो । पाकिस्तानको अन्तर्राष्ट्रिय टी ट्वान्टी क्रिकेट प्रतियोगितामा यो दोस्रो दश विकेटको जित हो ।

पाकिस्तानको जितमा ओपनर ब्याट्सम्यान समेत रहेका कप्तान बाबर आजमले अविजित रहँदै ११० रनको योगदान दिए । उनले मात्र ६६ बलमा ११ चौका र पाँच छक्काको सहयोगमा शतकीय पारी खेले । अर्का ओपनर मोहम्मद रिजवानले मात्र ५१ बलमा पाँच चौका र चार छक्काको सहयोगमा ८८ रनको योगदान दिए ।

त्यसअघि, कराँचीमा टस जितेर पहिला ब्याटिंग गरेको इंग्ल्याण्डले मोइन अलिको विष्फोटक पारीको सहयोगमा २० ओभरमा पाँच विकेटको क्षतिमा १९९ रनको योगफल तयार गरेको थियो ।

मोइनले मात्र २३ बलमा चार चौका र चार छक्काको सहयोगमा ५५ रनको योगदान गरे । बेन डकेटले ४३ तथा फिल साल्टले ३० रनको योगदान दिए । पाकिस्तानका लागि शहनवाज दहानी र हरिश रौफले सामान दुई दुई तथा मोहम्मद नवाजले एक विकेट लिए ।