समानुपातिक बन्दसूचीको बिरोधलाई टालटुल पार्ने मोडमा देउवा

९ असोज, काठमाडौं । नेपाली कांग्रेसका सभापति शेरबहादुर देउवाले समानुपातिक बन्दसूचीमा पार्टीभित्र उठेको बिरोधको स्वरलाई पुन टालटुल पार्ने तयारीमा जुटेका छन् । शनिबार साँझ प्रधानमन्त्री निवास बालुवाटारमा सभापति देउवा र उपसभापति धनराज गुरुङबीच भएको भेटवार्तामा वरिष्ठ नेता डा. शेखर कोइराला पक्षको असन्तुष्टि सम्बोधन गर्न आफू तयार रहेको आश्वासन दिएका छन् ।

निर्वाचन आयोगमा बुझाइएको समानुपातिक सूचीमा एकलौटी गरेको भन्दै सत्तारुढ दल नेपाली कांग्रेसमा असन्तुष्टि चुलिदै गएको छ । पार्टीमा देखिएको असन्तुष्टिलाई समाधान गर्न सभापतिज्यूले असोज १२ गतेसम्म फेरि बसेर कहाँ के गर्न सकिन्छ ? त्यो कुरा गरौंला भन्नुभएको छ । हामीले समस्याको समाधान खोज्ने हो । समस्या देखाएर समस्याबाट भाग्ने होइन ।’ गुरुङले नेपालबहसलाई भने ।

पार्टी सञ्चालनमा पनि विधानको बाटो बिराएको, सरकार सञ्चालनको बाहनामा पार्टीभन्दा गठबन्धनलाई बढी महत्व दिएका सभापति देउवाविरुद्ध वरिष्ठ नेता शेखर कोइराला पक्षीय नेताहरुले अनशन, धर्ना र निर्वाचन बहिष्कारसम्मका वैकल्पिक संघर्षको योजना तयार पारेपछि सभापति देउवाले फेरि टालटुले प्रतिक्रिया दिएका हुन् ।

कोइराला समूहले समानुपातिक उम्मेदवारको बन्दसूचीमा एकलौटी गरिएको भन्दै सच्याउन माग गरिरहेको छ । कोइराला पक्षका केही केन्द्रीय सदस्य, वर्तमान र पूर्व जिल्ला सभापति, भ्रातृ संस्थाका पूर्व पदाधिकारी लगायतले पार्टीभित्र न्यायोचित व्यवहार नभएको भन्दै विद्रोहको चेतावनी दिएका छन् । १६५ निर्वाचन क्षेत्रमध्ये गठबन्धनभित्र कांग्रेसले पाउने सीटमा आफूहरुले ४० प्रतिशत हिस्सा पाउनुपर्ने कोइराला पक्षको अडान कायमै रहेको छ ।

सभापति देउवा सभापति पार्टीसँग टाढा, गठबन्धनसँग निकट हुँदै गएपछि शेखर पक्षीय नेताहरुले समानुपातिक बन्दसूची नसच्याए र प्रत्यक्षमा न्यायोचित ढंगले टिकट वितरण नगरेमा बालुवाटार घेराउदेखि चुनाव बहिस्कारसम्म गर्ने शनिबार काठमाडौंमा खबरदारी सभामार्फत चेतावनी दिएका थिए ।

शेखर समूहले पटकपटक भेला र बैठक गरेर सभापति शेरबहादुर देउवालाई दबाब दिंदै आएको छ । कांग्रेसले प्रत्यक्षतर्फ उम्मेदवार चयन गर्नेबारे भने छलफल गरिसकेको छैन । सत्ता गठबन्धनसँग मिलेर कांग्रेस मंसिर ४ मा हुने प्रतिनिधिसभा र प्रदेशसभा चुनावमा जाने निर्णय गरेको थियो । कांग्रेसले प्रत्यक्षतर्फ कति सीटमा उम्मेदवारी दिने भन्ने पनि टुंगो लागेको छैन।