तेस्रो टी ट्वान्टीमा जितसँगै भारतले अष्ट्रेलिया विरुद्धको श्रृखंला उचाल्यो

९ असोज, काठमाडौं । भारतले अष्ट्रेलिया विरुद्धको तीन खेलको टी ट्वान्टी श्रृखंला जितेको छ । तेस्रो तथा अन्तिम टी ट्वान्टी खेलमा अष्ट्रेलियालाई छ विकेटले हराउँदै भारतले श्रृखंला २–१ ले आफ्नो पक्षमा पारेको हो । पहिलो टी ट्वान्टी अष्ट्रेलियाले जितेपनि दोस्रो र तेस्रो गरी लगातार दुबै खेल भारतले जितेको हो ।

हैदराबादमा अष्ट्रेलियाले प्रस्तुत गरेको १८७ रनको लक्ष्य पछ्याउँदै भारतले खेल सकिन एक बल बाँकी छँदा ४ विकेटको क्षतिमा पुरा गर्यो । भारतको जितमा सूर्यकुमार यादव र विराट कोहली उत्कृष्ट पारी खेले । ३० रनमा दुबैजना ओपनरलाई गुमाएको भारतका लागि कोहली र यादवले १०३ रनको उत्कृष्ट साझेदारी गरेर जित नजिक पुर्याए । यादवले मात्र ३६ बलमा पाँच चौका र पाँच छक्काको सहयोगमा ६३ रनको विष्फोटक पारी खेले । जितका लागि चार बलमा पाँच रन आवश्यक छँदा कोहली पेभेलियन फर्किएपनि हार्दिक पाण्ड्याले चौका लगाएर भारतको जित सुनिश्चित गरे ।

त्यसअघि टस हारेर पहिला ब्याटिंग गर्ने निम्ता पाएको अष्ट्रेलियाले पुरा २० ओभर खेल्दै सात विकेटको क्षतिमा १८६ रनको योगफल तयार गर्यो । उसको पारीमा ओपनर टिम देविडले सर्वाधिक ५४ र ओपनर क्यामरुन ग्रीनले ५२ रनको पारी खेले । भारतका लागि अक्षर पटेलले सर्वाधिक तीन तथा भुवनेश्वर कुमार, युज्वेन्द्र चाहल र हर्षल पटेलले सामान एक एक विकेट लिए ।