प्रधानन्यायाधीशको लफडा किनारा लगाउनु पर्थ्याे : गौतम

♦ दीपक शर्मा

 १० असोज, बर्दिया । राष्ट्रियसभा सदस्य वामदेव गौतमले नेपालगञ्जमा पत्रकारसँगै कुरा गर्दै राष्ट्रपतिले नागरिकता विधेयक प्रमाणीकरणको विषयमा भुल गरेको टिप्पणी गरेका छन् । कुरा चपाएर बोलेका वामदेव गौतमले खुलेरै राष्ट्रपतिको कार्यको विरोध नगरे पनि समर्थन पनि गरेनन् । उनले पत्रकार सम्मेलनमा यो गल्ती भएको बताएपनि यसको नजिता राष्ट्रपतिलाई घाटा हुने बताएका थिए ।

त्यसो त बर्दियाली जनतासँग रिसाएका बामदेव गौतम लामो समयपछि बर्दिया आएका हुन् । एकजना पार्टीका कार्यकर्ताको आफन्तको विवाहको निम्तोमा आएका उनले नेपालगञ्जमा पत्रकारसँग कुरा गर्दै अधिकांश समय सामान्य रुपमा राष्ट्रपतिको आलोचना मात्र गरिरहे । राष्ट्रपतिले पनि धेरै कुरा बुझेको हुँदा केही न केही सोच बनाएर नै नागरिकता विधेयक प्रमाणीकरण नगरेको हुनुपर्ने बताए । एक अर्काे प्रसंगमा गौतमले प्रधानन्यायाधीश चोलेन्द्रशमशेर जबरा विरुद्ध महाअभियोग दर्ता गरेको वर्तमान सरकारले अपराध गरेको दावी गरेका छन ।

गौतमले भने एउटा व्यक्तिलाई बीचमा झुन्डाइएको छ, उसलाई न माथि जान दिइएको छ न त तल नै जान दिइएको छ । यो अवस्था ठिक नभएको गौतमको तर्क थियो ।