कालिमाटीको जिलेट सहकारीले करोडौं ठग्यो, दर्जन बढी पक्राउ सूचीमा

१० असोज, काठमाडौं । पछिल्लो समय सहकारी संस्थाले बचतकर्तालाई ठगी गर्ने क्रम बढिरहेका बेला कालीमाटीस्थित जिलेट बचत तथा ऋण सहकारी संस्था लिमिटेडले बचतकर्ताको करोडौं रुपैयाँ ठगी गरेको छ । मुद्दती निक्षेप र क्रमिक बचत खातामा जम्मा गरिएको रकम समेत आफ्ना बचतकर्ता सदस्यलाई माग बमोजिम फिर्ता गर्न नसक्दा उक्त सहकारी विरुद्ध प्रहरीमा उजुरी परेको थियो ।

प्रहरी वृत्त, कालीमाटीमा परेको उजुरीका आधारमा प्रहरीले जिल्ला अदालत काठमाडौंमार्फत दर्जन बढी उक्त सहकारीका पदाधिकारी तथा सञ्चालक सदस्यलाई रकम हिनामिना गरेको आरोपमा ठगी मुद्दा चलाउने भएको छ । त्यसका लागि उनीहरु सबैलाई पक्राउ पूर्जी जारी भइसकेको बुझिएको छ ।

प्रहरी वृत्त, कालीमाटीका अनुसार जिलेट सहकारीका अध्यक्ष ओमकुमारी शर्मा पक्राउ परिसकेको र बाँकीको खोजी भइरहेको छ । प्रहरीले दिएको जानकारी अनुसार उक्त सहकारीका पूर्व अध्यक्ष रामगोपाल महर्जन, सचिव नेत्र खड्का, कोषाध्यक्ष नारायणदेवी डंगोल, रविन्द्र महर्जन, इन्द्रमान श्रेष्ठ, मधुसुधन पाठक, सागर मानन्धर, जीवन पौडेल, यसोदा मानियाँ, विनिता लिम्बु र पार्वती पुलामी प्रहरीको खोजी सूचीमा छन् ।

अचम्म लाग्दो त के छ भने पक्राउ सूचीमा रहेकाहरु खुलेआम हिडिरहेको अवस्थामात्र छैन कि उनीहरु जोसुकैले मोवाइल फोन समेत उठाएर ढुक्कैले कुरा गर्छन् । यस विषयमा प्रहरीसँग सम्पर्क गर्दा प्रहरीले भने ठगी मुद्दामा जोडिएर पक्राउ सूचीमा परेका सबैको व्यापक खोजी भइरहेको बताउने गरेको छ ।