मोरङ, चितवन र कैलालीमा मोटामोटी सहमति, नेताको चित्त बुझाउँन दलहरुलाई हम्मे

१३ असोज, काठमाडौं । सत्ता गठबन्धनमा आवद्ध दलहरुले मोरङ, चितवन र कैलाली जिल्लाको सीट बाँडफाँडमा मोटामोटी सहमति जुटेको बताएका छन् । कार्यदलले मोटामोटी सहमति जुटाएपनि बाँडफाँडबाट कुने पनि दल सन्तुष्ट देखिएका छैनन् । सहमति जुटेको भनिएका क्षेत्रमा दलका नेताहरुले नै असन्तुष्टि जनाइरहेको बताइएको छ ।

नेताहरुले सीट संख्या र निर्वाचन क्षेत्रमा बढी असन्तुष्टि जनाएका छन् । बैठकमा सहभागी एक नेताले दिएको जानकारी अनुसार प्रतिनिधिसभातर्फ चितवनका तीन निर्वाचन क्षेत्रमा भागबण्डा मिलेको छ । जसमध्ये दुई वटा निर्वाचन क्षेत्र कांग्रेसले र एउटा निर्वाचन क्षेत्र माओवादी केन्द्रले पाउने सहमति भएको छ । नेपाली कांग्रेस चितवनले जिल्ला समितिको निर्णय अनुसार नै केन्द्रीय गठबन्धनले चितवनको भागबण्डा मिलाएको जनाएको छ ।

संघतर्फ कांग्रेसले चितवनको क्षेत्र नम्बर १ र २ मा उम्मेदवारी दिने तथा माओवादी केन्द्रले क्षेत्र नम्बर ३ मा उम्मेदवारी दिनेगरी सहमति गरेका छन् । उता, मोरङका ६ निर्वाचन क्षेत्रमध्ये ४ वटा कांग्रेस पाउने सहमती भएको बताइएको छ । मोरङका ४ र ५ नक्बर निर्वाचन क्षेत्र माओवादीले लिने गरी सहमति भएपनि क्षेत्र नम्बर ५ मा जसपाले दावी नछाडेकाले माओवादी र उसकाबीच सहमति हुन बाँकी छ ।

ती नेताका अनुसार सुदूरपश्चिमको सबैभन्दा बढी निर्वाचन क्षेत्र रहेको कैलाली जिल्लामा पनि सिट बाँडफाँड करीब सकिएको छ । आगामी मंसिर ४ गते हुने निर्वाचनका लागि प्रतिनिधिसभातर्फ सिट बाँडफाँड भएको हो । ५ वटा निर्वाचन क्षेत्र रहेको कैलालीको क्षेत्र नं. १, ४ र ५ कांग्रेसले लिने र क्षेत्र नम्बर २ र ३ माओवादी केन्द्रले लिने सहमति भएको छ ।

कैलालीमा स्थानीय नेताहरुले भने कांग्रेसको भागमा परेका निर्वाचन क्षेत्रप्रति असहमती राखेका छन् । उनीहरुले सीट बाँडफाँटमा केन्द्रीय सहमतिविपरीत भएको बताएका छन् । कैलाली कांग्रेसले ४ वटा निर्वाचन क्षेत्र आफूहरुले पाउनुपर्ने माग राख्दै आएको छ । निर्वाचन क्षेत्र नम्बर १ बाहेकका क्षेत्र काँग्रेसले पाउनुपर्ने उनीहरुको तर्क छ । यस्तै । कैलालीमा सिट नपाएपछि नेकपा एकीकृत समाजवादीले पनि विरोध जनाएको छ ।