गठबन्धनबाट जसपा बाहिरिएपछि लोसपाका नेताहरु बालुवाटार पुगे

२१ असोज, काठमाडौं । पार्टी दलीय सत्ता गठबन्धनबाट जसपा बाहिरिएपछि लोकतान्त्रिक समाजवादी पार्टी ‘लोसपा’का नेताहरु बालुवाटार पुगेका छन् । सत्तारुढ दलको बैठक चलिरहदाँ आगामी ४ मंसिरका लागि तय भएको निर्वाचनमा सिट वाँडफाँटका लागि लोसपा नेपालका नेताहरु वालुवाटार पुगेका हुन ।

सत्तारुढ गठबन्धनको प्रमुख घटक जनता समाजवादी पार्टी नेपाल नेकपा एमालेसँग सिट वाँडफाँटका लागि अन्तिम तयारी भईरहेको वेला लोसपा नेपाल बालुवाटार पुग्नुले राजनीतिमा नयाँ सहमतिको प्रयासको रुपमा बुझिएको छ ।

शरदसिंह भण्डारी, अनिलकुमार झा, जितेन्द्र सोनालसहितको टिम गठबन्धनसँग चुनावी तालमेलका लागि बालुवाटार पुगेर नयाँ सम्झौताको आधार तय गर्ने बुझिएको छ । बालुवाटारमा सत्ता गठबन्धनको बैठक चलिरहेको छ ।

बिहानदेखि बसिरहेको बैठकमा जनता समाजवादी पार्टी ‘जसपा’का नेताहरु आएका थिएनन् । एमाले र जसपा सहमति नजिक पुगेपछि गठबन्धनका नेताहरुले जसपासँग सम्वाद थालेका हुन् ।

सिट बाँडफाँट टुंग्याउन कांग्रेस, माओवादी, एकीकृत समाजवादी र राष्ट्रिय जनमोर्चाका नेताहरुबीच विहान ९ बजेदेखि बालुवाटारमा बैठक जारी छ ।