ओली सरकार ढालेको रिस टिकट वितरणमा, रावलदेखि भूसाल सम्मलाई राजनीतिमा रोक्ने प्रयास

२२ असोज, काठमाडौं । नेकपा एमालेका अध्यक्ष केपी ओलीले माधव नेपाल समूहमा लागेर आफ्नो सरकार ढाल्न सहयोग गर्नेहरुलाई प्रत्यक्षमा टिकट नदिई प्रतिशोध साँधेका छन् । आम निर्वाचन– २०७९ का लागि प्रत्यक्षतर्फको उम्मेदवारी दर्ता गर्न दुई दिन बाँकी रहँदा ‘१० बुँदे’ पक्षधर नेताहरु मध्ये कतिपयलाई प्रतिशोध साँधेर टिकटमा बद्ला लिएका हुन् ।

अध्यक्ष ओलीले १० बुँदे पक्षधर एमाले नेताहरुलाई आगामी निर्वाचनमा भीम रावलबाटै प्रतिशोध साँधन शुरु गरेका हुन् । आगामी निर्वाचनपछि भिम रावलले संसदीय दलको निर्वाचनमै अप्ठेरो पार्ने अवस्था देखेपछि अछाममा माओवादीबाट एमालेमा प्रवेश गरेका झपट बोहोरालाई टिकट दिएर रावललाई ठिक लगाएका छन् । रावलले चितवन सम्पन्न १० औं महाधिवेशनमा ओलीलाई चुनौति दिएका थिए ।

आफ्नै गृहजिल्ला झापाका लागि तय गरेको उम्मेदवार सूचीलार्य हेर्दा पनि ओलीले आफू अनुकुलका नेताहरुलाई अघि सारेका छन् । झापा– १ मा ओलीले पूर्व कानूनमन्त्री एवं महान्यायाधिवक्ता अग्नि खरेललाई प्रत्यक्षतर्फको टिकट दिने तयारी गरेका छन् । झापा– २ मा राष्ट्रिय सभाका पूर्व सांसद देवराज घिमिरेलाई उम्मेदवारका रुपमा खडा गर्ने तयारी गरेका छन् । झापा– ३ मा राप्रपा अध्यक्ष राजेन्द्र लिङ्देनलाई सघाउने निर्णयमा ओली पुगिसकेका ओलीले छन्। झापा– ४ मा निवर्तमान सांसद लालप्रसाद साँवा लिम्बूलाई यसपटकपनि उम्मेदवारीका लागि टिकट दिने भएका छन् ।

झापा– २ की निवर्तमान सांसद पवित्रा खरेल निरौलालाई साइजमा राख्न घिमिरेलाई टिकट दिइएको हो । उनी प्रतिनिधि सभाको अन्तर्राष्ट्रिय सम्बन्ध तथा मानवअधिकार समितिकी निवर्तमान सभापति समेत हुन् । निवर्तमान सांसद निरौला एमालेभित्र ‘१० बुँदे’ पक्षधर नेताको रुपमा चिनिन्छन् । शेरबहादुर देउवालाई प्रधानमन्त्री बनाउन गरिएको हस्ताक्षर अभियानमा एमालेका १० बुँदे पक्षधर केही नेता सहभागी भएपनि निरौलाले भने हस्ताक्षर गरेकी थिइनन् । विभाजनपूर्व एमालेभित्र माधव नेपाल पक्षधर नेतृका रुपमा चिनिएकी उनी नेपालले एमाले विभाजन गरी ‘एकिकृत समाजवादी’ गठन गर्दा त्यसमा पनि सक्रिय थिइनन ।

यसपटक ओलीले घनश्याम भुसाललाई पनि टिकट नदिने भएका छन् । चितवनमा कृष्ण पोखरेलले टिकट पाइसक्दा सुरेन्द्र पाण्डेको टिकट अझै अलमलमा रहेको छ । ताप्लेजुङमा रहेका एमाले सचिव योगेश भट्टराईको भने टिकट कन्फर्म भैसकेको छ । कैलालीमा १० बुँदे पक्षधरका झपट रावल र ओखलढुंगामा यज्ञराज सुनुवारले टिकट पाएका छन् । कैलालीमै १० बुँदे पक्षधरका द्धारिका न्यौपानेले टिकट पाएका छन् ।

यसैगरी गोकर्ण विष्ट, सुरेन्द्र मानन्धरको अझै टुंगो छैन । सिन्धुपाल्चोकमा सरेश नेपाल र शेरबहादुर तामाङलाई टिकट दिइएको छ । त्यसैगरी कञ्चनपुरमा दिपक भट्टलाई रोकेर निरु पाललाई टिकट दिइएको छ । सिन्धुलीमा गणेश पहाडी रोकिएका छन् भने बर्दियामा लक्ष्मण ज्ञावालीलाई टिकट दिएर १० बुँदे पक्षधरलाई रोकिएको छ ।