निर्वाचनपछिको प्रधानमन्त्रीमा कांग्रेसका कोइराला र थापाको दावी

२३ असोज, काठमाडौं । नेपाली कांग्रेसका नेता डा.शशांक कोइराला र महामन्त्री गगन थापाले निर्वाचनपछि बन्ने सरकारको नेतृत्व गर्ने दावी गरेका छन् । आइतबार प्रतिनिधिसभा सदस्य उम्मेदवारको मनोनयन दर्तापछि दुवै नेताले आगामी प्रधानमन्त्रीको दावी गरेका हुन् ।

कोइरालाले निर्वाचनपछि आफू प्रधानमन्त्री बन्ने दाबी गरे । निर्वाचन अधिकृतको कार्यालय कावासोतीमा मनोनय दर्ता गरेपछि पत्रकारसँग कुराकानी गर्दै कोइरालाले आफू यस पटकको निर्वाचनमा विजय भएपछि प्रधानमन्त्री बन्ने बताएका हुन् ।

‘तीन पटकसम्म चुनाव जितिसकेको छु । यस क्षेत्रका जनताले मलाई विश्वास गरेका छन्’ उनले भने,‘यो चुनाव जितेपछि म राष्ट्रको सेवा गर्न कांग्रेसको तर्फबाट प्रधानमन्त्रीको उम्मेदवारको रुपमा अगाडी बढ्ने छु । पार्टी भित्रपनि मैले सोही अनुसार कुराकानी गरेको छु ।’

यस्तै कांग्रेसका महामन्त्री गगन थापाले निर्वाचनपछि सरकारको मूल नेतृत्वको दाबी गर्ने बताएका छन् । काठमाडौं ४ बाट उम्मेदवार दर्तापछि पत्रकारसँग कुरा गर्दै सरकारको नेतृत्व लिएर मुलुक हाँक्ने उनले बताएका हुन् । उनले भने, ‘ड्राइभिङ सिटमा अब आफैं बस्ने हो । अब आउने पाँच वर्ष आफैं ड्राइभिङ सिटमा बसेर मूल दायित्व लिने प्रयत्न गर्ने हो । फल कस्तो आउँछ, समयले बताउला ।’

निर्वाचन क्षेत्रका नियमित दायित्वका विषयसँगै सरकार तथा पार्टीको मूल नेतृत्व दाबी गर्ने समय आफ्नो लागि आएको उनले बताए । जोश र आवश्यक अनुभव भएकाले मूल नेतृत्वमा दाबी रहेको उनले बताए । काठमाडौं क्षेत्र नम्बर ४ ले आफूलाई पहिचान दिएको उल्लेख गर्दै थापाले यो ठाउँबाट प्रतिनिधित्व गर्न पाउँदा गौरव लागेको बताए ।