ज्योतिष नक्षेत्र अनुसार २०७९ को आम निर्वाचन ओली र देउवाका लागि साढेसात सरह !

२५ असोज, काठमाडौं । ज्योतिष विज्ञानले किटान नगरेपनि आगामी मंसिर ४ का लागि तय गरिएको प्रदेश र प्रतिनिधिसभा निर्वाचनमा सुदूरपूर्व र सुदूरपश्चिमबाट नियमित चुनाव जित्दै आएका नेकपा एमालेका अध्यक्ष तथा पूर्वप्रधानमन्त्री केपी शर्मा ओली र हाल प्रधानमन्त्रीसमेत रहेका नेपाली कांग्रेसका सभापति शेरबहादुर देउवाका लागि साढेसातीभन्दा पनि खतरा देखिएको छ ।

एमाले अध्यक्ष ओली झापा क्षेत्र नं ५ बाट लगातार सातौं पटक संसदीय चुनावमा भाग लिइरहेका छन् भने हालका प्रधानमन्त्री देउवा पनि सातौँ पटक चुनाव लड्दैछन् । स्थानीय र ज्यातिष विज्ञानमा आस्था राख्नेहरुले यसलाई साढेसातको दशाभन्दा खतरा रहेको अनुमान गरेका छन् । यसको आधार भने उनीहरुसँंग प्रतिस्पर्धा गर्न आएका अन्य उम्मेदवार र उनीहरुले गरेको विगतको कामलाई लिइएको छ ।

२०४८ सालयता लगातार चुनाव लड्दै आएका ओलीले मंसिर ४ को आगामी चुनावमा भारी मतका साथ जीत हासिल गर्ने दाबी गरेका छन् । देउवाको पनि भारीमतले विजयी हुने अपेक्षा रहेको छ । दुवै साढेसाती पूर्वप्रधानमन्त्रीहरु छुट्टाछुट्टै गठबन्धनमा समेत रहेका छन् ।

ओलीले ०४८, ०५१ र ०५६ को संसदीय निर्वाचनमा तत्कालीन झापा क्षेत्र नं. ६ बाट चुनाव लडेका थिए । उक्त तीन वटै निर्वाचनमा ओली निर्वाचित भएका थिए । ०६४ को संविधानसभा निर्वाचनमा ओली पराजित भए । त्यसबेला उक्त क्षेत्र झापा ७ थियो । उक्त निर्वाचनमा माओवादी केन्द्रका विश्वदीप लिङ्देन निर्वाचित भएका थिए ।

त्यसबेला लिङ्देनले १६ हजार ९९ मत पाएका थिए भने पराजित ओलीले १४ हजार ९ सय ५९ मत पाएका थिए । ०७० को दोस्रो संविधानसभा निर्वाचनमा ओली निर्वाचित भए । क्षेत्र नं. ७ नै रहेको उक्त निर्वाचनमा ओलीले कांग्रेसका स्थानीय नेता सुरेश सुब्बा, राप्रपाका राम थापा तथा माओवादी नेता गोपाल किराँतीलाई पराजित गरेका थिए । निर्वाचन क्षेत्र हेरफेरपछि झापामा ७ बाट ५ वटा क्षेत्र निर्धारण गरिएको थियो । ०७४ को निर्वाचनमा झापा ५ बाट चुनाव लडेका ओलीले सर्वाधिक मत प्राप्त गर्दै जीत हासिल गरेका थिए ।

उक्त चुनावमा बाम गठबन्धनको उम्मेदवार बनेका ओलीलाई राप्रपाको समेत सहयोग थियो । त्यसबेला ओलीले कांग्रेसका खगेन्द्र पाण्डव अधिकारीलाई पराजित गरेका थिए । उक्त निर्वाचनमा ओलीले ५७ हजार १ सय ३९ मत पाएका थिए भने कांग्रेसका अधिकारीले २८ हजार २ सय ९७ मत पाएका थिए । यसपटक पनि झापा ५ मा एमालेबाट ओली र गठबन्धनबाट कांग्रेसका खगेन्द्रबीच नै मुख्य प्रतिस्पर्धा हुने भएको छ । यसपटक कांग्रेसका अधिकारीलाई माओवादी केन्द्रसहित गठबन्धनको सहयोग छ ।

यता, हालका प्रधानमन्त्री तथा नेपाली कांग्रेसका सभापति शेरबहादुर देउवाले पनि मंसिर ४ गते हुने प्रतिनिधिसभा निर्वाचनका लागि डडेल्धुराबाट उमदवारी दर्ता गरेका छन् । उनको उम्मेदवारीले यो समाचार तयार पार्दासम्म आधिकारिकता पाएको छैन् । कारण उनको नागरिकतामा भएको जन्ममिति र मतदाता परिचयपत्रमा भएको मिति मिलेको छैन । यसको निर्णय निर्वाचन आयोगले गर्ने भएपनि सत्तारुढ गठबन्धनको निर्णयअनुसार गर्न आयोग तयार भएको बताइएको छ ।

प्रतिनिधिसभा सदस्यको निर्वाचनका लागि देउवा डडेल्धुराबाट विसं २०४८ मा पहिलो पटक प्रतिनिधिसभा सदस्य निर्वाचित भएका थिए । त्यस यताका सबै आमनिर्वाचनहरुमा उनी निर्वाचित हुँदै आएका छन् । उनले प्रतिनिधिसभाका लागि भएको पछिल्लो २०७४ सालको निर्वाचनमा डडेल्धुराबाट नै छैटौँ पटक निर्वाचित भएका थिए । विसं २०४८ यताका सबै निर्वाचनमा विजयी भएका देउवा आसन्न निर्वाचनमा पनि डडेल्धुराका जनताको साथ, समर्थन र मायाले आफ्नो इतिहासलाई कायम राख्दै निरन्तरता दिने बुझिएको छ ।

कांग्रेसबाट लगातार ६ पटक चुनाव जितेर पाँचपटक प्रधानमन्त्री बनेका शेरबहादुर देउवाले सातौं पटकका लागि आइतबार उम्मेदवारी दर्ता गराएका छन् । विगतमा सहज जीत निकाल्दै केन्द्रमा धाउने गरेका देउवालाई यसपटकको निर्वाचनमा उनले नै राजनीतिमा ल्याएका कांग्रेस बीपीका वरिष्ठ उपसभापति कर्ण मल्ल चुनौती बन्न सक्ने आंकलन गरिएको छ ।

देउवालाई माओवादी केन्द्र र एकीकृत समाजवादी पार्टीले सघाउदा कर्ण मल्ललाई एमालेले समर्थन दिएको छ । कर्ण मल्ल कांग्रेस डडेल्धुराका पूर्वसभापति पनि हुन् । २०७४ को निर्वाचनमा उनले कांग्रेसबाटै डडेल्धुराबाट प्रदेशसभा निर्वाचन जीतेका थिए । यसका साथै प्रधानमन्त्री देउवालाई कडा प्रश्न सोधेर चर्चामा आएका गुल्मीका युवा सागर ढकालले पनि डडेल्धुराबाटै प्रतिनिधिसभामा स्वतन्त्र उम्मेदवारी दर्ता गराएका छन् ।

यसअघि विसं २०४८, २०५१, २०५६, २०६४, २०७० र २०७४ मा भएका निर्वाचनमा डडेलधुराबाट विजयी देउवा विसं २०६४ मा कञ्चनपुर– ४ र २०७० मा कैलाली– ६ बाट पनि विजयी भएका थिए । उनी विसं २०४८ मा सांसद बनेपछि गृहमन्त्री भएका थिए । २०५१ को मध्यावधि निर्वाचनपछि बनेको मनमोहन अधिकारी नेतृत्वको सरकार अल्पमतमा परेपछि २०५२ सालमा देउवाको नेतृत्वमा नै सरकार गठन भएको थियो ।

यसपछि २०५९, २०६१, २०७४, २०७८ मा गरी उनी पाँच पटक प्रधानमन्त्री भइसकेका छन् । आगामी मङ्सिर ४ गतेको निर्वाचनमा भने देउवालाई हालको सत्ता साझेदार गठबन्धनको पनि समर्थन रहेको छ । देउवासँगै तीन पटक प्रतिस्पर्धा गरेका नेकपा माओवादीका खगराज भट्ट अहिले प्रदेशसभाका लागि गठबन्धनबाटै चुनाव लड्दै छन् ।