रेशम चौधरीको उम्मेदवारी खारेज, लक्ष्मण थारुको पनि बदर

♦ दीपक शर्मा

२५ असोज , बर्दिया । कैलालीको टीकापुर घटनामा दोषी ठहर भई कारागारमा रहेका रेशम चौधरी र फरार रहेका लक्ष्मण थारुको उम्मेदवारी खारेज भएको छ ।

नागरिक उन्मुक्ति पार्टीको तर्फबाट बर्दिया–२ मा प्रतिनिधिसभा सदस्यको उम्मेदवारी मनोनयन गरेका रेशम लाल चौधरीको उम्मेदवारी खारेज हुने निर्णय भएको निर्वाचन अधिकृत नगेन्द्र लम्सालले बताए चौधरी जिल्ला अदालत कैलाली र उच्च अदालत डोटीबाट दोषी ठहर भएको र २०७४ फागुन १४ गतेदेखि निरन्तर कैदमा रहेको पुष्टि भएकाले उम्मेदवारी खारेज भएको उनले बताए । यता उच्च अदालत दिपायलले जन्म कैद फैसला सुनाएका नागरिक उन्मुक्ति पार्टिका लक्ष्मण थारुको उम्मेदवारी बदर भएको छ ।

कैलाली क्षेत्र न ५ बाट प्रतिनिधिसभा सदस्यमा वारेस मार्फत उम्मेदवारी दिएका थारुको उम्मेदवारी बदर भएको मुख्य निर्वाचन अधिकृतको कार्यालयले जनाएको छ । नौ जनाको ज्यान जाने गरी भएको टिकापुर घटनामा मुछिएका लक्ष्मण थारुलाई उच्च अदालत दिपायलले २०७८ पुस २ गते जन्म कैदको फैसला सुनाएको थियो