यी चर्चित अनुहार जसको उम्मेदवारी खारेजीमा पर्याे

२६ असोज, बर्दिया । मंसिर ४ गते हुने प्रतिनिधिसभा र प्रदेशसभाको निर्वाचनका लागि उम्मेदवारी दर्ता गराएका केही चिरपरिचित अनुहारको उम्मेदवारी खारेजी भएको छ ।

बर्दियाको क्षेत्र न २ मा प्रतिनिधिसभाका लागि नागरिक उन्मुक्ति पार्टीबाट उम्मेदवारी दर्ता गराएका रेशमलाल चौधरीको उम्मेदवारी खारेज भएको छ । २०७२ साल भदौमा कैलालीको टिकापुर घटनाका मुख्य योजनाकार रहेको भन्दै जिल्ला अदालत कैलाली र उच्च अदालत दिपायलले जन्मकैदको फैसला गरेका कारण हाल डिल्लीबजार कारागारमा रहेका रेशम चौधरीमाथि एक नाबालकसहित ९ जना प्रहरीको हत्या गरेको आरोप लागेको छ । चौधरीको मुद्धा हाल सर्वोच्च अदालतमा रहेको छ । तल्लो तहका दुवै अदालतले सजाए सुनाएको अवस्थामा उम्मेदवार बन्न नपाउने भएका कारण उनको उम्मेदवारी खारेज गरिएको हो ।

बर्दिया क्षेत्र न २ बाट वारिसमार्फत उम्मेदवारी दर्ता गराएका रेशम चौधरीको उम्मेदवारी खारेज गरिएको निर्वाचन अधिकृतको कार्यालय राजापुर बर्दियाका प्रमुख नगेन्द्र लम्सालले बताए । अब सो क्षेत्रमा रेशमको वुबा जसले स्वतन्त्र उम्मेदवार दर्ता गराएका थिए पार्टीले उनलाई समर्थन गर्ने भएको छ । २०७२ सालमा भएको टिकापुर हत्याकाण्डपछि फरार रहेका रेशम चौधरीले २०७४ सालमा भुमिगत अवस्थाकै बेला निर्वाचन जितेका थिए । निर्वाचन जितेपछि आत्मसमर्पण गरेका उनलाई अदालतले पुर्वक्षका लागि थुनामा पठाएको थियो ।

यसै गरी सोही घटनामा संलग्न भएका कैलालीकै लक्ष्मण थारुको उम्मेदवारी पनि खारेज गरिएको छ । थारु कैलालीको प्रतिनिधिसभा क्षेत्र न ५ बाट नागरिक उन्मुक्ति पार्टीबाट वारिसमार्फत उम्मेदवारी दिएका थिए । थरुहट आन्दोलका क्रममा कैलालीको टिकापुर २०७२ सालमा भएको हिंसात्मक आन्दोलनको दोषी ठहर गरी उच्च अदालत दिपायलले कर्तव्य ज्यानमुद्धामा जन्मकैदको सजाय सुनाएको थियो । त्यसयता थारु फरार छन ।

यस्तै अर्को चर्चित अनुहार हो, रुपन्देही २ मा सत्ता गठबन्धनका तर्फबाट उम्मेदवार बनेका एकीकृत समाजवादीका नेता राजु गुरुङ , उनको पनि उम्मेदवारी खारेज भएको छ । उनलाई चेक अनादरसम्बन्धि मुद्धामा काठमाडौं जिल्ला अदालतले जरिवाना गर्ने फैसला गरेको थियो । गुरुङले उक्त जरिवाना भुक्तान नगरेको विषयमा निर्वाचनको अधिकृतको कार्यालयमा उजुरी परेको थियो त्यसैका आधारमा उनको उम्मेदवारी खारेजीमा परेको हो । सोही निर्वाचन क्षेत्रमा स्वतन्त्र उम्मेदवारी दिएका कमल भुसाल, डा निकोलेसको पनि उम्मेदवारी खारेजीमा परेको छ ।

उनले हाम्रो नेपाली पार्टीबाट उम्मेदवारी दिएका थिए । उनीमाथि नेपाल सरकारको छात्रवृत्ति कोटामा चिकित्साशास्त्र अध्ययन गरिरहेको र सरकारबाट आर्थिक लाभ लिइरहेको उजुरीका आधारमा उम्मेदवारी खारेजीमा परेको हो । सो क्षेत्रमा गठबन्धनको तर्फबाट उम्मेदवार बनेकाको र अर्का नाम चलेकाको उम्मेदवारी खारेज भएपछि नेकपा एमालेका उपाध्यक्ष विष्णु पौडललाई निर्वाचन जित्न सहज हुने बताइएको छ ।