शेयर कारोबारमा सुधार, नेप्सेमा ११.३६ अंकको वृद्धि

२६ असोज, काठमाडौं । लगातार दुई दिन घटेको शेयरबजारमा साताको चौथो कारोबार दिन बुधबार भने दोहोरो अंकले वृद्धि भएको छ । बुधबार बजार परिसूचक नेप्से ११.३६ अंकले वृद्धि भएर १८६६.५२ अंकमा बन्द भएको छ । यस्तै ‘क’ वर्गका कम्पनीलाई मापन गर्ने सेन्सिटिभ इन्डेक्स पनि २.४८ अंकले वृद्धि भएर ३६६.११ अंकमा बन्द भएको छ ।

दशैं पछिको पहिलो कारोबार दिन आइतबार नै ४४ अंकको उच्चवृद्धि भएको नेप्से त्यसपछिको सोमबार र मंगलबार लगातार दुई दिन घटेको नेप्सेमा आज बढेर बन्द भएको छ । नेप्सेमा वृद्धि हुँदा उपसूचकहरुमा पनि म्युचुअल फण्ड र व्यापार बाहेक सबै बढेका छन् ।

नेप्सेमा सुधार हुँदा बुधबार कारोबार रकम पनि वृद्धि भएको छ । मंगलबार ५५ करोडमा झरेको कारोबार रकम बढेर करिब ७० करोड पुगेको हो । बुधबार बजारमा २० लाख ८५ हजार २८४ कित्ता शेयर किनबेच हुँदा ६९ करोड १७ लाख ३८ हजारको कारोबार भएको छ । जसमध्ये नबिल बैंकको २ करोड ४० लाख १२ हजारको कारोबार हुँदा रिडी हाइड्रोपावरको २ करोड २ लाख ६४ हजार र एनआईसी एशिया लघुवित्तको संस्थापक शेयर १ करोड ८९ लाख ७७ हजारको किनबेच भएको छ ।

बुधबार बजारमा कुल १८५ कम्पनीको शेयर किनबेच भएकोमा १४० कम्पनीको शेयर मूल्यमा वृद्धि हुँदा ३९ कम्पनीको घटेको छ । त्यस्तै ६ कम्पनीको शेयरमूल्य स्थिर छ । जसमध्ये अभियान लघुवित्तको शेयरमूल्य १० प्रतिशतले बढेर सकारात्मक सर्किट मूल्यमा बन्द हुँदा महुली लघुवित्तको शेयरमूल्य ५.५१ प्रतिशत र प्रोग्रसिभ फाइनान्सको शेयर मूल्य ५.३५ प्रतिशतले वृद्धि भएको छ ।