जसपासँगको सहकार्यले एमालेलाई ‘डबल डिजिट’को फाइदा !

२७ असाेज, काठमाडौं । एमालेसँग सहकार्य गरेको जनता समाजवादी पार्टी (जसपा) नेपालले प्रतिनिधिसभामा ८० भन्दा बढी सीटमा तथा प्रदेशसभामा १४३ भन्दा बढी सीटमा उम्मेदवारी मनोनयन दर्ता गराएको छ । नेकपा एमालेसँग प्रतिनिधिसभामा जसपाले ३५ सीटमा मात्र तालमेल गरेर अन्य स्थानमा आफ्नो तरिकाले उम्मेदवार उठाएको हो ।

समानुपातिक मत बढाउनका लागि यसपल्ट जसपाले धेरैजसो स्थानमा आफ्नो एकल उम्मेदवारी दिएको हो । एमालेसँग सहकार्य भए बोहकका स्थानमा जसपासा र एमाले दुवै दलले मैत्रीपूर्ण प्रतिस्पर्धा गर्न पाउने गरी भएको सहमतिअनुसार नै उम्मेदवारी मनोनयन दर्ता गराइएको हो ।

खास गरेर मधेश प्रदेशलाई प्राथमिकतामा राखेर एमाले र जसपाबीच चुनावी तालमेल भएपनि १ नम्बर प्रदेशमा पनि तालमेल गरी केही सीटमा उम्मेदवारी दिइएको छ । मधेश प्रदेशको कुल ३२ सीट मध्ये १७ सीटमा जसपाले उम्मेदवारी मनोनयन गरेको छ । १४ सीटमा एमालेसँग तालमेल गरिएको छ भने ३ सीटमा एमाले र जसपाबीच मैत्रीपूर्ण प्रतिस्पर्धा हुने गरी उम्मेदवारी मनोनयन गरिएको छ ।

एमालेले जसपासँग सहकार्य गरेको भएपनि प्रभु साह फ्याक्टरले एमालेलाई अवरोध गरिरहेको छ । करिब करिब मधेश प्रदेशमै एमालेको टिकट कब्जा गरेर फरार रहेका साहले आफू र आफू लगायतका धेरै नेताहरुलाई स्वतन्त्र उम्मेदवारी दिन लगाई विद्रोह गरेका थिए । मधेश प्रदेशको कुल ६४ सीट मध्ये ३६ सीटमा जसपाले उम्मेदवारी दिएको छ अन्य स्थानमा एमालेसँग सहकार्य गरेको छ ।

सत्ता गठबन्धन छाडेर प्रतिपक्षी गठबन्धनमा जसपा सहभागी हुनु जसपाका लागि घाटाको निर्णय भएको कतिपयको विश्लेषण छ । सत्ता गठबन्धनमा हुँदा नेपाली कांग्रेस र नेकपा माओवादी केन्द्र, नेकपा एकीकृत समाजवादीको मत पाएर जसपाले पाउने सीटमा लगभग जीत निश्चित नै हुन्थ्यो । तर, नेकपा एमालेसँग मात्र गठबन्धन गरेर जाँदा पाँचदलीय गठबन्धनभन्दा बढी सीट जसपाले पाए पनि थोरैमा मात्र जित्न सक्ने कतिपयको विश्लेषण छ । एमालेसँग गठबन्धन भएपछि १६५ सीट मध्ये ३५ सीटमा जसपाले एमालेलाई मतदान गर्नेछ ।

जसपालाई साथमा लिएपछि एमालेलाई प्रभु साहको प्याक्टर वेफाईदा भएको छ । नेकपा एमाले जसरी पनि पाँचदलीय सत्ता गठबन्धनलाई भत्काउन चाहन्थ्यो, त्यसमा एमालेले सफलता पाएको छ । अर्कातर्फ जसपाले १ नम्बरमा पनि सीट खोजेको थियो । जसपाका संघीय परिषद् अध्यक्ष अशोक राईको संसदीय क्षेत्र १ नम्बर प्रदेशमा हुनुका साथै उपेन्द्रजीको घर पनि विराटनगर रहेकाले मोरङ र सुनसरीमा उपेन्द्र यादवले सिट पाएका छन् । अर्कातर्फ सुनसरीमा अशोक राईको क्षेत्रमा पनि पकड जमाउन जसपा सफल भएको बताइएपनि त्यहाँ जसपाले चुनाव जित्ने संभावना निकै कम रहेको नेताहरुको दावी रहेको छ ।

धरानवरपर कांग्रेसभन्दा पनि एमालेसँगको तालमेल जसपाका लागि बढी सुरक्षित महसुस गरेपनि एमाले त्यहाँ असन्तुष्ट रहेको छ । उपेन्द्रको मुख्य प्राथमिकता मधेश प्रदेश हो । त्यहाँ सत्ता गठबन्धनले प्रदेश सभाको ६४ सीट मध्ये बढीमा २० देखि २२ सीट मात्र दिन चाहेको थियो । तर त्यहाँ एमालेले धेरै सिट दियो । अहिले दुवै पक्षको गठबन्धनबाट एमाले डबल डिजिटमा चुनाव जित्न चाहन्छ भने जसपा पनि एमालेको साथबाट आफूलाई मधेशमा पहिलो दलको रुपमा कायम गर्न चाहन्छ । मधेशमा जसपा नै बलियो रहेको कारण एमालेले पनि जसपासँगको सहकार्यलाई सहज लिएको छ । एमालेले डबल डिजिटको फाइदा लिन खोजेपनि प्रभू साहको स्वतन्त्र उम्मेदवारीले एमालेलाई धक्का लागेको छ ।