कांग्रेसले बोलायो कार्यसम्पादन समितिको बैठक, घोषणपत्र र बागी उम्मेदवार मूख्य एजेण्डा

२७ असोज, काठमाडौं । नेपाली कांग्रेसले आगामी निर्वाचनका लागि जनतामा लिएर जाने घोषणापत्र र देशभरका बागी उम्मेदवारमाथिको कारवाहीका विषयमा छलफल गर्न केन्द्रीय कार्यसम्पादन समितिको बैठक बोलाएको छ । बैठकमा निर्वाचन र गठबन्धनभित्रका दलहरुले निभाउनुपर्ने भूमिका लगायतका विषयमा पनि छलफल हुनेछ ।

पार्टी सभापति एवं प्रधानमन्त्री शेरबहादुर देउवाले शुक्रबार दिउँसो २ बजे सानेपास्थित पार्टी कार्यालयमा बस्ने गरी केन्द्रीय कार्यसम्पादन समितिको बैठक बोलाएको मुख्यसचिव कृष्णप्रसाद पौडेलले जानकारी दिएका छन् । उनले पार्टीको टिकट वितरणमा भएका कमिकमजारीको पनि समीक्षा गरिने बताए ।

बैठकमा केन्द्रीय कार्यसम्पादन समितिका पदाधिकारी एवं सदस्यहरूको सहभागी हुनेछन् । आगामी ४ मंसिरमा हुने प्रदेश र प्रतिनिधिसभा निर्वाचनमा कांग्रेसबाट उम्मेदवारी दिएकाहरुको परिचालन रणनीतिका विषयमा छलफल केन्द्रित रहनेछ ।

सत्तारुढ गठबन्धनका उम्मेदवारविरुद्ध विभिन्न जिल्लामा बागी उम्मेदवारी दिएका नेताहरूको विषयमा छलफल गर्न तथा चुनावी घोषणापत्रका विषयमा छलफल गर्न केन्द्रीय कार्यसम्पादन समितिको बैठक बोलाइएको कांग्रेसका मुख्यसचिव पौडेलले बताए ।