कांग्रेस नेतृत्वमा सरकार आएपछि पाँच वर्षमा धरै ठूलो परिवर्तन ल्याउँछः वरिष्ठ नेता पौडेल

२८ असोज, काठमाडौं ।  नेपाली कांग्रेसका वरिष्ठ नेता रामचन्द्र पौडेलले कांग्रेस सत्तामा नपुगेसम्म देशको ग्रामिण क्षेत्रको विकासमा परिवर्तन नआउने बताएका छन् । उनले शहर बनाएर मात्र देश नबन्न भन्दै देश बनाउन ग्रामिण विकास आवस्यक रहेको बताएका छन् ।

चुनाव प्रचार अभियान अन्तर्गत कार्यकर्ता भटघाटका लागि तनहुँ पुगेका पौडेलले अहिलेको अस्थिर राजनीतिक अवस्थालाई पार लगाएर स्थिर सरकार बनाएर काम गर्न जनताले कांग्रेसलाई साथ दिनुपर्ने बताए । उनले कांग्रेसले विगतमा सरकारको नेतृत्व गरेपनि विभिन्न अवरोध र राजनीतिक लडाइले गर्दा काम गर्न नपिाएको बताए ।

पौडेलले देशको आर्थिक विकासका लागि राजनीतिक स्थिरता र सुशासन कायम गर्न आवस्यक हुने बताए । उनले ओली नेतृत्वको सरकारले देशमा अस्थिरता मच्चाएर राज्य व्यवस्थालाई नै धरापमा पुर्याएकाले यसबाट देशलाई बचाउन वर्तमान गठबन्धन बनेको बताए । उनले देशलाई अस्थिरताबाट स्थिरतातर्फ ल्याउनका लागि सत्ता गठबन्धन क्रियाशील रहेको दावी गरे ।

वरिष्ठ नेता पौडेलले २०७४ मा जनताले कम्युनिष्टहरुलाई त्यति ठूलो बहुमत दिँदा पनि देशमा कुनै काम हुन नसकेको उल्लेख गरे । उनले दुइतिहाई नजिक भोट पाएका कम्युनिष्टको नेतृत्व गरेका केपी शर्मा ओलीले सरकार चलाउन नसकेको भन्दै अब पनि कम्युनिष्टलाई भोट दिए देश धरापमा पर्ने दावी गरे ।

उनले गाउँमै रोजगारी र गाउँमै आम्दानी सिर्जना हुने वातावरण बनाउने अभियानमा कांग्रेस सरकार लाग्ने र आफूले सोही लक्ष्य लिएर राजनीति सुरु गरेको बताए । गाउँमा सुविधा र रोजगारीको अवसर नभएपछि मानिस सहर झरेको भन्दै पौडेलले अहिले गाउँमा सबै सुविधा पुगिसकेकाले अब आम्दानी र रोजगारीको अवसर पनि कांग्रेसले दिने बताए ।

तनहुँले विकासमा काँचुली फेर्ने जिकिर गर्दै वरिष्ठ नेता पौडेलले शेरबहादुर देउवाको नेतृत्वमा सरकार बनेपछि यो समयमा मात्र तनहुँमा दुई अर्बभन्दा बढी बजेट आएको र यसले निरन्तरता पनि पाउने उल्लेख गरे । सडक, पुल, खानेपानीको विकासले तीव्रता पाएको र कृषि तथा पर्यटनमा पनि क्रान्ति हुँदै गएको उनको भनाई थियो ।