नेकपा एमालेबाट निकालिए स्थायी कमिटी सदस्य प्रभु साह

२८ असोज रौतहट । पार्टीभित्र विवाद चर्कदै गएपछि नेकपा एमालेले स्थायी कमिटी सदस्य तथा मधेश प्रदेशका सहइन्चार्ज प्रभु साहलाई पार्टीबाट निष्कासन गरेको छ । पार्टीले साहसहित रौतहट जिल्ला इन्चार्ज उपेन्द्र साह र सहइन्चार्ज कुन्दन कुस्वाहालाई समेत पार्टीबाट साधारण सदस्यसमेत नरहने गरी निष्कासन गरेको हो ।

एमालेका महासचिव शंकर पोखरेलले शुक्रबार एक विज्ञप्ति जारी गर्दै उनीहरूलाई साधारण सदस्यसमेत नरहने गरी पार्टीबाट निष्कासन गरिएको जनाएका छन् ।  एमालेले प्रतिनिधिसभाको उम्मेदवारका लागि साहलाई टिकट दिएर पठाएको थियो । तर, साहले एमालेको टिक खल्तिमै राखेर स्वतन्त्रबाट उम्मेदवारी दिएका थिए । यसपछि विवाद सुरु भएको थियो ।

महासचिव पोखरेलद्वारा जारी विज्ञप्तिमा उनीहरू पार्टी विरोधी क्रियाकलापमा संलग्न रहेकाले पार्टीको सदस्यता समेतबाट निष्कासन गरिएको उल्लेख गरिएको छ । यस्तै रौतहट जिल्ला इन्चार्जको जिम्मेवारी पार्टीका सह इन्चार्ज उद्वव रेग्मीलाई दिइएको छ । आफुले पाएको जिम्मेवारी सफलता पूर्वकसम्पादन गर्न महासचिव पोख्रेलले आग्रह गरेका छन् ।

यसैगरी, एमालेको रौतहट जिल्ला कमिटी विघटन भएको छ । एमाले मधेश प्रदेश कमिटीका अध्यक्ष राम अवतार यादवले शुक्रबार रौतहटमा त्रिभुवन साह अध्यक्ष रहेको जिल्ला कमिटी विघटन गरेका छन । प्रदेश अध्यक्ष यादवले दीपक राय यादवलाई जानकारी पत्र दिँदै जिल्ला कमिटी विघटन भएको जानकारी दिएका छन् ।