प्रभु क्यापिटलद्वारा प्रशिक्षण कार्यक्रम सम्पन्न

३० असोज, काठमाडौं ।  प्रभु क्यापिटल लिमिटेडले प्रशिक्षण कार्यक्रम सम्पन्न गरेकाे छ । विश्व लगानीकर्ता सप्ताह–२०२२ को अवसरमानेपाल धितोपत्रबोर्ड तथा काठमाडौं जिल्ला अदालत बार एसोसिएसनको समन्वयमा प्रभु क्यापिटलले जिल्ला अदालत बार एसोसिएसनको कार्यसमिति तथा अन्य सदस्य अधिवक्ताहरूलाई १ दिने तालिम कार्यक्रम काठमाडौंमा सम्पन्न गरेको हाे ।

कार्यक्रम नेपाल हाउस रेष्टुरेन्ट, हात्तीसार, काठमाडौंमा शुक्रबार सम्पन्न भएको कम्पनीले जनाएको छ । धितोपत्र बजारमा लगानी गर्दा हुने जोखिम व्यवस्थापनको विषय तथा धितोपत्रबजारमा संलग्न विभिन्न पक्षले पालना गर्नुपर्ने नीति नियमप्रति सचेतना अभिवृद्धि गर्ने उद्देश्यले सेक्युरिटी रिक्स म्यानेजमेन्ट एन्ड लिगल इस्युज विषयमा क्यापिटलले यो कार्यक्रमको आयोजना गरेको बताएको छ ।

यो विश्व लगानीकर्ता सप्ताह इन्टरनेसनल अर्गनाइजेसन अफ क्युरिटीज कमिसनको आह्वानमा प्रत्येक वर्ष अन्तर्राष्ट्रिय स्तरमा सेयर लगानीसम्बन्धी विविध कार्यक्रम गरी मनाइने गरिन्छ । तालिममा प्रशिक्षण दिने कार्य प्रभु क्यापिटल लिमिटेडका तर्फबाट प्रमुख लगानी अधिकृत दुर्गानन्द झा तथा विज्ञ प्रशिक्षकको रूपमा धितोपत्र बोर्डका कानुनी विभागका एक्टिङ डाइरेक्टर राजाराम दुवालले प्रदान गरेका थिए ।

कार्यक्रममा एसोसिएसनका उपाध्यक्ष पुरुषोत्तम अधिकारी, सचिव उज्वलराम श्रेष्ठ, कोषाध्यक्ष सन्तोष भण्डारीलगायत कार्यसमिति सदस्यहरूसमेत गरी करिब ६० जनाको सहभागिता थियो ।