स्याङ्जा निर्वाचन क्षेत्र नं. १ बाट ६ जनाको उम्मेदवारी फिर्ता, प्रतिनिधिसभामा र प्रदेशसभामा १२–१२ जनाको भीडन्त

२६ असोज, स्याङ्जा । स्याङ्जाको निर्वाचन क्षेत्र नं. १ बाट २ स्वतन्त्रसहित ६ जनाले आआफनो उम्मेदवारी फिर्ता लिएका छन् । फिर्ता लिनेमा नेपाली कांग्रेसका तर्फबाट २ जना र नेकपा एकीकृत समाजवादीका २ जना छन्। प्रतिनिधिसभा १ तथा प्रदेशसभा (क र ख) का ६ जना उम्मेदवारले तोकिएको समयभित्र उम्मेदवारी फिर्ता लिएका हुन्।

फिर्ता लिनेमा प्रतिनिधिसभाका ३ जना र प्रदेशसभा (क) का एकजना र (ख) का २ जनाले उम्मेदवारी फिर्ता लिएका हुन। नेपाली कांग्रेस स्याङ्जाका महासमिति सदस्य समेत रहेका गोविन्दबहादुर रानाभाटले प्रतिनिधिसभा सदस्य पदका लागि स्वतन्त्र उम्मेदवारी दर्ता गरेकोमा उनले बुधवार अन्तिम समयमा आफनो उम्मेदवारी फिर्ता लिएका छन् ।

यसैगरी, नेकपा एकीकृत समाजवादीका बिष्णु गिरीले गठबन्धनको निर्णय बमोजिम फिर्ता लिएको बताए । अर्का स्वतन्त्र उम्मेदवार अर्जुनप्रसाद पौडेलले पनि उम्मेदवारी फिर्ता लिएका छन् । यसैगरी, प्रदेश (क) बाट नेपाली कांग्रेसका नेता एवं गण्डकी प्रदेशका शिक्षामन्त्री मेखलाल श्रेष्ठ र प्रदेश (ख) बाट नेकपा एकीकृत समाजवादीका केन्द्रीय सदस्य शर्मिला पौडेलले उम्मेदवारी फिर्ता लिएका छन् भने मनोज नेपालीले पनि फिर्ता लिएको मुख्य निर्वाचन अधिकृतको कार्यालयले जनाएको छ।

गठबन्धनको निर्णय बमोजिम क बाट उम्मेदवारी दिएका मेखलाल श्रेष्ठले फिर्ता लिएका हुन् । उनले गठबन्धनको निर्णय बमोजिम उम्मेदवारी फिर्ता लिएको बताए। गठबन्धनले सो क्षेत्र नेकपा माओवादी केन्द्रलाई दिने निर्णय गरेको थियो। यस्तै, प्रदेश (ख) बाट उम्मेदवारी दिएकी नेकपा एकीकृत समाजवादीका केन्द्रीय सदस्य शर्मिला पौडेलले उम्मेदवारी फिर्ता लिएको बताइन् । गठबन्धनकै निर्णय बमोजिम उम्मेदवारी फिर्ता लिएको उनको भनाई छ ।

यसैगरी, स्वतन्न्त्र रुपमा उम्मेदवारी दिएका मनोज नेपालीले पनि उम्मेदवारी फिर्ता लिएको कार्यालयले जनाएको छ । यो सँगै अब स्याङ्जा निर्वाचन क्षेत्र नं. १ को प्रतिनिधि र प्रदेशसभा गरी ३ सदस्यका लागि प्रतिनिधिसभा सदस्यमा १२ जना, प्रदेश (क) मा ७ जना र (ख) मा ५ जनाबीच चुनावी प्रतिस्पर्धा हुनेभएको छ।