काठमाडौंमा सत्ता गठबन्धनको संयुक्त प्रशिक्षण, प्रतिगमनको खतरा अझै नटरेको नेताहरुको निष्कर्ष

३० असोज, काठमाडौं । सत्ता गठबन्धनका शीर्ष नेताहरुले देशमा अझै पनि प्रतिगमनको खतरा नटरेको बताएका छन् । आइतबार काठमाडौंमा आयोजित सत्ता गठबन्धनको संयुक्त प्रशिक्षण कार्यक्रमलाई सम्बोधन गर्दै शीर्ष नेताहरुले अहिलेको गठबन्धनलाई पछिसम्म लानुपर्नेमा जोड दिएका छन् ।

काठमाडौंमा संयुक्त प्रशिक्षण कार्यक्रम प्रधानमन्त्री शेरबहादुर देउवाले प्रतिगमनको खतरा अझै बाँकी रहेको बताए । उनले भने, ‘नेपालमा लडेर ल्याएको यो प्रजातन्त्र जो छ यसलाई स्थायित्व दिन जरुरी छ । प्रतिगमनको खतरा अझैपनि छ । त्यसैले सबै पार्टी एक हुन जरुरी छ ।’ देउवाले अहिलेको अवस्थामा गठबन्धन जरुरी रहेको भन्दै मिलेर नै लोकतन्त्रलाई संस्थागत गर्नुपर्ने बताए ।

‘गठबन्धन संस्कृतिको विकास जे भएको छ, यो मिलेर चुनाव लड्ने र मिलेर लोकतन्त्रको सुदृढिकरण गर्दै देशको गरिबी हटाउने यो मौका पनि हो चुनौति पनि हो’, प्रधानमन्त्री देउवाले गठबन्धनका तर्फबाट साझा उम्मेदवार बनेकी ओनसरी घर्ती साहसी महिला भएको टिप्पणी गरे ।
‘ओनसरी साहसी महिला हुनुहुन्छ । सभामुख हुँदा अत्यन्तै कुशलतासाथ जिम्मेवारी पुरा गर्नुभएको छ । मलाई त विश्वास पनि थिएन । तर सफलतापूर्वक जिम्मेवारी पुरा गर्नुभयो । सभामुख हुँदा पार्टी भन्दा पनि राष्ट्रको हित हेर्नुभयो’, देउवाको भनाइ छ ।

कार्यक्रममा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले काठमाडौं निर्वाचन क्षेत्र नम्बर २ की गठबन्धनका उम्मेदवार ओनसरी घर्तीमा असाधारण क्षमता रहेको बताए । प्रचण्डले रोल्पामा जन्मिएर आएकी घर्तीलाई आफ्नै प्रस्तावमा सभामुख बनाएको र सभामुख बनेर कुशलतापूर्वक जिम्मेवारी पुरा गरेको भन्दै अब पनि उनलाई जिताएर पठाए राम्रो विकासे मन्त्री बनाएर पठाउने आश्वासन दिए ।
प्रचण्डले गठबन्धनका तर्फबाट प्रतिगमनका विरुद्ध अपिल जारी गरिने बताए । उनले भने, ‘हामी गठबन्धनकै चरणमा अपिल पारित गर्दै छौँ । आमजनताको नाममा गठबन्धनको तर्फबाट त्यसको मुख्य नारा संविधानको रक्षा, स्थिरता र समृद्धिका लागि गठबन्धन हुने छ । विकास निर्माण समृद्धि मुख्य एजेण्डा हुने छ । आर्थिक विकासको अभियानलाई द्रुत गतिमा अगाडि बढाउन सकेनौँ भने राजनीतिक परिवर्तनलाई दिगो बनाउन सक्दैनौं । देशको अस्थिरता र अराजकताको भुमरीमा फस्ने खतरा रहने छ ।’

प्रतिगमनका विरुद्ध लड्दै गर्दा गठबन्धन गर्ने चरणको अवस्थासम्म पुगेको प्रचण्डले बताए । ‘स्थानीय तहको चुनाव सकेर अब प्रदेश र संघको चुनावको चरणमा आइपुगेका छौँ । धेरै उतारचढाव र घुम्ती मोडहरू पार गरेका छौँ’ उनले भने, ‘देशमा राजनीतिक परिवर्तन हुने भएपछि दिगो नहुने भइरहेको छ । ०७ साल, ०१७ साल, ०४६ सालको कुरा गरौं र अहिलेको अवस्थामा पनि त्यहीँ दोहोरिएको छ । अब राजनीतिक स्थिरताका लागि यो गठबन्धन बलियो बनाउनु पर्नेछ ।’

यस्तै नेकपा एकीकृत समाजवादीका अध्यक्ष एवम् पूर्वप्रधानमन्त्री माधवकुमार नेपालले आगामी प्रतिनिधिसभा र प्रदेशसभा निर्वाचनमा सत्तारुढ गठबन्धनलाई नै आम मतदाताले विजयी गराउनुपर्ने बताए । सत्तारुढ गठबन्धनकै भविष्य रहेकाले आम मतदाताले सोही गठबन्धनलाई आगामी निर्वाचनमा विजयी गराउनुपर्ने उनको भनाई थियो ।

अध्यक्ष नेपालले धरापमा परिसकेको संविधान र लोकतन्त्रलाई रक्षा गरेर सत्तारुढ गठबन्धनले मुलुकलाई ठूलो दुर्घटनाबाट जोगाएकाले पनि जनताले गठबन्धनमा आवद्ध दलका उम्मेदवारहरुलाई जिताउनुपर्ने तर्क समेत गरे । उनले भोलिको भविष्य पनि सत्तारुढ गठबन्धनको नै भएकाले त्यसका नेताहरुले आफूहरुको समस्या समाधान गर्न सक्छन भनेर विश्वास गर्न पनि आम मतदातालाई आग्रह गरे ।