निर्वाचनबारे नयाँ नीति सार्वजनिक गर्न कांग्रेसले डाक्यो पत्रकार सम्मेलन

३१ असोज, काठमाडौं ।  निर्वाचन र पार्टीका आगामी रणनीति र कार्यक्रमबारे जानकारी दिन नेपाली कांग्रेसले सोमबार (आज) पत्रकार सम्मेलन गर्ने भएको छ । कांग्रेसका मुख्यसचिव कृष्णप्रसाद पौडेलले दिएको जानकारी अनुसार सोमबार दिउँसो ३ बजे पार्टी मुख्यालय सानेपामा पत्रकारहरुलाई बोलाइएको छ । पत्रकार सम्मेलनमा पार्टी प्रवक्ता प्रकाशशरण महत उपस्थित हुनेछन् ।

कांग्रेसले बागी उम्मेदवारहरुलाई दिएको डेटलाइन पनि आजै सकिँदैछ । कांग्रेस घोषणापत्रका विषयमा पनि विभिन्न टिक्का टिप्पणी भइरहेका छन् । यीनै विषयमा जानकारी गराउन कांग्रेसले पत्रकार सम्मेलन गर्न लागेको हो । प्रबक्ता महतले पत्रकार सम्मेलनमा निर्वाचन र पार्टी गतिविधिसम्बन्धीबारे जानकारी दिने बताइएको छ ।

महत प्रतिनिधिसभा र प्रदेशसभा निर्वाचन २०७९, केन्द्रीय प्रचार प्रसार समितिका संयोजकसमेत रहेकाले थप नयाँ विषय पनि आउने बताइएको छ । खासगरी कांग्रेसले पाँच वर्षे कारवाहीमा परेकाहरुलाई निर्णयमा पुनर्विचार गरी निर्णय सच्याउन असोज ३१ गते सम्मको समय दिएको थियो । यो समयभित्र उम्मेदवारी फिर्ता नलिएकाहरु त्यसलाई निष्क्रिय बनाए उनीहरुमाथि लगाइएको पाँच वर्षे कारवाही फुकुवा हुने जनाएको थियो ।

कांग्रेसका प्रतिनिधिसभा र प्रदेशसभामा सत्तारुढ गठबन्धनका उम्मेदवारविरुद्ध बागी उम्मेदवारी दिएकाहरुलाई ३१ असोजसम्म उम्मेदवारी निष्क्रिय पार्न आग्रह गर्दै समय दिइएको हो । कांग्रेसले गत बुधबार विज्ञप्ति जारी गरी सत्ता गठबन्धनविरुद्ध बागी उम्मेदवार बन्नेलाई पार्टीबाट ५ वर्षका लागि निष्कासन गरेको बताएको थियो । यदि ३१ असोजसम्म उम्मेदवारी निष्क्रिय बनाएमा कारबाही फुकुवा हुने काग्रेसले जनाएको थियो ।

असोज ३१ भित्र बागीले उम्मेदवारी निष्क्रिय बनाएमा त्यस्ता विद्रोही उम्मेदवार तथा तिनका प्रस्तावक र समर्थक उपरको कारवाही पार्टी केन्द्रले आवश्यक प्रक्रिया पुर्याइ फुकुवा गर्ने भनिएको छ । बागीले आफ्ना उम्मेदवारी निष्क्रिय नबनाएको खण्डमा पाँच वर्षे कारवाही यथावत रहने भनिएको थियो । उक्त समय आज सकिक्दैछ । कसले फिर्ता लिए र कसले लिएनन् भन्नेबारे पनि आजको पत्रकार सम्मेलनमा जानकारी दिने बताइएको छ ।