कर्तव्य ज्यान मुद्दाका दोषी १२ वर्षपछि पक्राउ

३१ असोज, भक्तपुर । प्रहरीले १२ वर्षअघिदेखि फरार एक अभियुक्तलाई पक्राउ गरेको छ ।

प्रहरी वृत्त ठिमीबाट खटिएको प्रहरी टोलीले प्रेमबहादुर रानालाई ठिमी संगमचोकबाट नियन्त्रणमा लिएको महानगरीय प्रहरी परिसर भक्तपुरले जनाएको छ ।

उनलाई २४ माघ ०६७ मा दाङकाे साविक सैघा गाविस–२ कोइला बस्तीका ३२ वर्षका सूर्यबहादुर रानाको हत्या मुद्दामा दाङ जिल्ला अदालत देउखुरीबाट जन्मकैद सजाय फैसला भएको थियो । त्यसबेलादेखि उनी फरार थिए ।

पक्राउपछि उनलाई जिल्ला अदालत भक्तपुरमा पेश गरिएकाे थियाे । अदालतकाे आदेशमा रानालाई तोकिएको कैद भुक्तानको लागि कारागार कार्यालय जगन्नाथदेवल काठमाडौ चलान गरिएको  छ ।