अरिंगालले चिल्दा सल्यानमा आमा–छोरीको मृत्यु

१ कात्तिक, सल्यान । सल्यानमा अरिंगालले चिल्दा एकै घरका आमाछोरीको मृत्यु भएको छ भने अर्का एक जना घाइते भएका छन् । जिल्लाको सिद्धकुमाख गाउँपालिका–१ हाम्फालकी २१ वर्षीया शोभा बुढाथोकी र उनकी ४ वर्षीया छोरी प्राप्ती बुढाथोकीको अरिंगालले चिल्दा मृत्यु भएको हो जिल्ला प्रहरी कार्यालय सल्यानका सूचना अधिकारी सन्तोष खनालले बताए ।

घाइते नवीन बस्नेतको श्रीनगरमा उपचार भैइरहेको छ । सोमबार बेलुका धान काटेर घर फर्कनेक्रममा उनीहरुलाई अरिंगालले चिलेको थियो । अरिंगालले चिलेपछि पछि तीनै जनाको सल्यानकै श्रीनगरस्थित एक अस्पतालमा सामान्य उपचारपछि आमा–छोरीलाई बाँकेको कोहलपुर रिफर गरिएको थियो ।

कोहलपुर तर्र्फ लैजाँदै गर्दा छोरीको बाटोमै मृत्यु भएको र उनकी आमाको कोहलपुर मेडिकल कलेजमा उपचारको क्रममा मृत्यु प्रहरीले जनाएको छ ।